Ji Dêrsimê peyama 8'ê Adarê 'Em ê bi jin jiyan azadî rêya xwe bidomînin' 

2024-03-09 15:28:15


	 

	 

	 

	DÊRSIM - Di mîtînga 8'ê Adarê ya li Dêrsimê de Parlamentera DEM Partî ya Dêrsimê Ayten Kordu axivî û got: "Em ê bi felsefeya 'Jin jiyan azadî' rêya xwe bidomînin." 

	 

	Bi sedan jin ji bo tevlî mîtînga 8'ê Adarê  ya ku bi pêşengiya Platforma Jinan a Dêrsimê ve hat organîzekirin bibin ji Kolana Hunerê kom bûn. Jinên ku li vir kom bûn ber bi Qada Seyîd Riza ve dest bi meşê kirin. Jinan di meşê de dirûşma “Jin jiyan azadî”, "Gulistan Doku li ku ye?" û "Em bêdeng nabin, natirsin û îteat nakin" berz kirin. Her wiha di meşê de pankarta "Li dijî xizanî, newekhevî, şîdet û şer têkoşîna bi rêxistîni" vekirin. 

	 

	Girseya ku gihaşt Qada Seyîd Riza mîtîng dest pê kir. Parlamentera Partiya Wekhevî û Demokrasiyê ya Gelan (DEM Partî) a Dêrsimê Ayten Kordû û parlamentera Partiya Kedê (EMEP) a Dîlokê Sevda Karaca, namzeta hevşaredariyê Bîrsen Orhan û gelek jin beşdarî mîtîngê bûn. 

	 

	Sevda Karaca di mîtîngê de bal kişand ser rewşa jinan û got: "Li bajarê ku ji her çar aliyê ve bi qereqolan hatiye dorpêçkirin jin winda bibin. Lê agahî ji  Gulistan Doku nîne. Em ê serî li ber desthilatdariya yek zilamî, zilm û zordariyê natewînin. Em silavên xwe ji girtiyên jin ên ku ji peyvîrê hatine girtin re dişînin. Di pêvajoya rêveberiyên herêmî de em ê hêzê bidin hev, em ê nîşan bidin ka pêşeroj û hêvî çi ye. Em ê bi hev re bi ser bikevin."

	 

	Piştre jî Ayten Kordu axivî û bal kişand ser çareseriya pirsgirêka kurd û wiha axivî: "Li girtîgehan greva birçîbûnê heye. Girtiyên siyasî li dijî çareseriya pirsgirêka Kurd û tecrîdê dest bi greva birçîbûnê kirin. Ji bo pergala serdest a mêr a ku şer diafirîne û çekan çêdike em vê dibêjin; li vir hêza avakirina aştiya bi rûmet heye, jin wê vê bikin. Ger çareseriya demokratîk a pirsgirêka kurd pêş nekeve, wê hemû pêşketinên antîdemokratîk bidomin. Di ketina bajêr de qereqolan ava dikin, di bin navê ewlehiyê de gel neçarî koçberiyê dikin û li bajêr polîtîkayên bêmiroviyê dimeşînin. Kevneşopiya me ya bawerîyek kevnar heye. Em jî weke Gelê Kurd û Elewî li dijî her cure qirkirinê têbikoşin. Bi binçavkirinan nikarin me bitirsînin. Serdest, desthilatdariya ku hewl dide me bişîne malê. Em dibêjin, em têkoşîna xwe ya ji bo jinan her roj mezin dikin. Em ê têkoşîna xwe ya jinê bi perspektîfa xwe ya tevgera jinê li her derê Kurdistanê bilind bikin. Bijî têkoşîna me ya rêxistinkirî, em ê bi felsefeya 'jin jiyan azadî' rêya xwe bidomînin.

	 

	Mîtîng piştî gerandina govendê bi dawî bû.