Viyan Soran hat bibîranîn 

2024-02-03 15:44:24


	 

	 

	NAVENDA NÛÇEYAN - Pakrewan Viyan Soran di salvegera 18’an a çalakiya xwe de li 3 navendan hat bibîranîn.

	 

	Ji bo bîranîna gerîlaya YJA-Starê pakrewan Viyan Soran (Leyla Walî Huseyîn) a ku hemberî komploya navneteweyî ya li dijî Rêberê PKK'ê Abdullah Ocalan 2’yê Sibata 2006’an de agir berda bedena xwe, çalakî hatin lidarxistin. Çalakî ji aliyê Kongra Star ve li Dêrik, Tirbespiyê û Til Temirê yên kantona Cizîrê hatin lidarxistin.

	 

	Til Temir

	 

	Bi heman minasebetê Kongra Star civînek li avahiya Meclisa Malbatên Şehîdan a navçeya Til Temirê li dar xist.

	 

	Civîn bi deqeyeke rêzgirtinê dest pê kir. Piştre bi navê Kongra Star Gulbihar Kobanê axivî û got: “Ji bo rê li ber dijmin bê girtin divê asta berxwedanê were mezinkirin. Divê em kesayeta şehîd Viyan wekî mînak ji xwe re bikin. Divê em li ser şopa wê bimeşin heta azadiya fîzîkî ya Rêber Abdullah Ocalan mîsoger bikin.”

	 

	Piştî axaftinan sînevîzyonek li ser jiyana şehîd Viyan Soran hat pêşandan û civîn bi dirûşmên silavkirina berxwedana  Abdullah Ocalan bi dawî bû.

	 

	Dêrik

	 

	Li navenda Kongra Star a li bajarê Dêrikê bîranîn bi beşdarbûna bi dehan jinan hat lidarxistin.

	 

	Piştî deqeya rêzgirtin endama Kongra Star Binefş Ebdo li ser şehîd Viyan Soran axivî û got: "Heval Viyan jineke Kurd ji eşîreke mezin ên li Başûrê Kurdistanê ye. Viyan li hemberî civaka feodal a ku jinan biçûk dixe serî hilda û di nava Tevgera Rizgariya Kurdistanê de dest bi rêwîtiya azadiyê kir."

	 

	Binefş Ebdo diyar kir ku Viyan Soran li hemberî komployên li dijî Abdullah Ocalan û Tevgera Rizgariya Kurdistanê agir berda bedena xwe û “bû meşaleyek ku welat ronî dike”.

	 

	Tirbespiyê 

	 

	Endamên Kongra Star ên li navçeya Tirbespiyê jî daxuyaniyek li ber avahiya xwe da. Daxuyanî ji aliyê endama Kongra Star Belqîs Hesen ve hat xwendin.

	 

	Di daxuyaniyê de hate gotin: "Şehîd Viyan temsîla zanebûn, îradeya xurt û berxwedanê dike. Şehîd Viyan li dijî siyasetên çewisandin û asîmîlasyonê yên li dijî gelê Kurd bedena xwe kir xelekek ji agir û bû sembola berxwedanê.”

	 

	Di daxuyaniyê de soza şopandina xeta pakrewan Viyan Soran û tevahî şehîdên azadiyê ta pêkanîna azadiya fîzîkî ya Rêber Abdullah Ocalan hate dayîn.