
Hîlala Zêrîn pakrewanên komkujiya Parîsê bi bîr anîn 

2024-01-07 13:30:50


	&nbsp;

	NAVENDA NÛÇEYAN - Tevgera Hîlala Zêrîn bi daxuyaniyekê şehîdên komkujiya yekemîn a Parîsê bi bîr anîn û diyar kirin ku berxwedana jinên têkoşer vekirina rêya azadiyê bû.

	&nbsp;

	Tevgera Hîlala Zêrîn a çanda jinan bi munasebera salvegera 11'emîn a Komkujiya Parîsê, daxuyaniyek li pêşiya Navenda Çand û Hunerê ya Mihemed Şêxo ya li bajarê Qamişlo da. Daxuyanî bi amadebûna endamên bi dehan jinan ji aliyê endama Hunergeha Welat Zîlan Mecîd ve hat xwendin.

	&nbsp;

	Zîlan Mecîd şehîdên komkujiya Parîsê Sakîne Cansiz Fîdan Dogan û Leyla Şaylemez, her wiha jinên siyasetmedar Sêvê Demîr, Fatma Uyar û Pakîze Nayir ên di qedexeya derketina derve ya 2016'an de li navçeya Silopiya ya Şirnexê ji aliyê dewleta tirk hatibûn şehîdxistin, bi bîr anîn û soza şopandina rêya wan da.

	&nbsp;

	Zîlan Mecîd anî ziman ku hedefgirtina siyasetmedarên jin ji aliyê dewleta ve wê îradeya wan neşkîne û wiha domand: "Jiyana kesayetên weke heval Sakîne û rêhevalên wê bi têkoşîn û berxwedana li hemberî desthilatdariyê tije û dagirtî bû. Berxwedana wan rêya azadiyê ji jinan re vekir û di cîhanê de bû sembol.”

	&nbsp;

	Zîlan Mecîd da zanîn ku şoreşa jinan a Rojavayê Kurdistanê xwe dispêre mîrasên dîrokî ya têkoşîna Tevgera Azadiyê û wiha domand: "Ji ber vê yekê rojane li herêmê jinên pêşeng ên şoreşê ku Sakîne Cansiz ji xwe re wek sembola berxwedanê didîtîn rastî êrîşên qirkirinê tên. Armanca dewleta tirk a qirker Kurdan qir bike, îradeya jinan bişkîne û xweseriya demokratîk ji holê rake.”

	&nbsp;

	Zîlan Mecîd bal kişand ser komkujiyên ku li dijî jinên têkoşer hatine kirin û diyar kir ku ev &nbsp;komkujî nîşaneya polîtîkayên qirkirina jinên Kurd û berdewama komploya navneteweyî ya li ser Abdullah Ocalan e. Zîlan Mecîd got: "11 sal di ser komkujiyê re derbas bûn, rayedarên dewleta Tirk a dagirker jî li xwe mukir hatin ku bi destê xwe bi awayekî plankirî ev komkujî pêk anîne. Tevî vê yekê jî dewleta Fransayê helwestek jî li hemberî dewleta Tirk a dagirker neda. Hetanî ku dewleta Fransayê hesab nepirse nikare xwe ji vê hevkariya Komkujiya Parîsê xelas bike."

	&nbsp;