
Li Zeynep Celaliyan poşmanî tê ferzkirin  

2023-12-03 15:58:19


	&nbsp;

	&nbsp;

	NAVENDA NÛÇEYAN - Hate hînbûn ku siyasetmedara Kurd Zeynep Celaliyan a 16 sal in li Îranê girtî ye, lêpirsîna kelepçekirî û poşmanî tê ferzkirin.

	&nbsp;

	Tora Mafên Mirovan a Rojhilatê Kurdistanê ragihand ku rayedarên Îranê di hefteyên borî de lêpirsîna girtiya siyasî ya Kurd Zeynep Celaliyan bi kelepçe kirine. Li gorî nûçeya NÛJINHA’yê, di daxuyaniyê de wiha hat gotin: “Zeynep Celaliyan ku bi kelepçekirî lêpirsîna wê hat kirin, ji bo ku bi malbata xwe re hevdîtinê pêk bîne jî poşmanî lê tê ferzkirin. Zeynep Celaliyan heta ku &nbsp;poşmaniyê qebûl neke, wê ji hemû mafên xwe yên bingehîn bêpar bimîne, di serî de gihandina xizmetên tenduristiyê.”

	&nbsp;

	Nayê dermankirin

	&nbsp;

	Siyasetmedara Kurd Zeynep Celaliyan di 26'ê Sibata 2008'an de hat girtin û cezayê muebetê lê hat birîn. Zeynep Celaliyan ku 2 sal û 8 meh in ji hemû mafên xwe bêpar e, li Girtîgeha Navendî ya Êzdê tê ragirtin. Zeynep Celaliyan gelek pirsgirêkên tenduristiyê yên wekî kêmbûna dîtinê, astim û gelek nexweşiyên wê yên din heye. Destûr nayê dayîn Zeynep Celaliyan ji xizmetên tenduristiyê sûdê werbigire û tedawî bibe.

	&nbsp;