Li Îranê qanûneke nû ya mahremiyeta jinan binpê dike 

2023-07-29 13:52:34


	 

	NAVENDA NÛÇEYAN - Dewleta Îranê qanûneke nû ya bi navê “Parastina malbatê bi rêya xurtkirina çanda îffet û hîcabê” zexta li ser jinan zêdetir dike û mahremiyeta jinan binpê dike.

	 

	Li gorî malpera Iran International pêşnûmeqanûna nû ku bi navê “Qanûna Hîcab û Îffetê” ji bo “parastina malbatê bi rêya xurtkirina çanda îffet û hîcabê” tê amadekirin.

	 

	Tê destnîşankirin ku pêşnûmeya nû ji 70 madeyan pêk tê, ev made di komîteya qanûnî û dadgerî ya parlamentoya Îranê de tên nîqaşkirin. Li gorî pêşnûmeyê, cezayên ji bo “derbaskirin an binpêkirinê” zêdetir dibin û mahremiyeta welatiyan ji her demê zêdetir tê binpêkirin.

	 

	Qanûna nû erkên wezaretên cuda mîna Wezareta Perwerdeyê, Xwendina Bilind, Îstixbarat, Pîşesazî û Bazirganî, Aborî, Peywendî û wezaretên din diyar dike. Di benda 5`an a qanûnê de cezayên ji bo kesên van qanûnan pêk neyin jî hatine diyarkirin.

	 

	Di pêşnûmeyê de bang li Wezaretên Perwerde, Zanist, Lêkolîn û Teknolojiyê tê kirin ku “lîsteyên edebê û pîvan û perspektîfên ji bo cureyê cilan ji bo mamoste, rêveber û xwendekaran” amade bikin.

	 

	Her wiha tê de tê diyarkirin ku divê rêbaza “Ji bo piştevaniya jiyana îslamî ya malbatê û çanda îffet û hîcabê” di dersên hemû qonaxên xwendinê de werin diyarkirin û tê destnîşankirin ku divê zanîngehên ku tenê jin tê de ne, bên vekirin.

	 

	Li gorî pêşnûmeyê, divê Wezareta Tenduristiyê jî sîstema bingehîn a taybet jî cilên mamoste, xwendekar û karmendên jin û mêr jî diyar bikin û nexweş û kesên bi wan re jî bi van perspektîfan agahdar bikin.

	 

	Ji bo Wezareta Aborî û Darayî jî divê “lixwekirina cilên ne ji rêzê, peyker, pêlîstok, tablo û hemû berhemên ku propagandaya tazîbûn, bêîffetiyê û eşkerekirina hîcabê dikin, qedexe bikin”.

	 

	(c)