Tecrîd li Zanîngeha Humboldtê hat şermezarkirin  

2023-07-19 13:02:43


	 

	 

	NAVENDA NÛÇEYAN - Jinên JXK’yî, li Zanîngeha Humboldt a li Berlînê têkildarê tecrîd û gefên li Rêberê PKK'ê Abdullah Ocalan danezan xwend û xwendevanan ji bo tevlîbûna meşa bi boneya salvegera Şoreşa 19’ê Tîrmehê li bajêr bê lidarxistin, vexwendin.

	 

	Jinên Xwendevanên Kurdistanê (JXK), ji bo balê bibin ser tecrîd û gefên li Rêberê PKK'ê Abdullah Ocalan û protestokirina salvegera 100’emîn a Peymana Lozanê, li Zanîngeha Humboldt a li paytexta Elmanya Berlînê, di çarçoveya pêngava ‘Jin, Jiyan, Azadî, ser bixe azadiyê’ çalakî lidarxistin.

	 

	JXK’yiyan, bi xwendina danezanê balkişandin ser tecrîd û gefan û diyar kirin ku paradîgmaya Rêberê PKK'ê Abdullah Ocalan ji bo hemû jin û gelan bûye hêvî.

	 

	JXK’yiyan her wiha banga tevlêbûna meşa bi boneya salvegera Şoreşa Rojava di 19’ê Tîrmehê de li qada Oranîentplatzê bê lidarxistin, kirin.