Rojnamevanên qetilkirina Jînayê kirin rojevê tên darizandin 

2023-05-30 11:15:35


	 

	 

	NAVENDA NÛÇEYAN - Rojnamevan Nîlûfer Hamedî û Elaha Mohammadî ku yekemîn nûçeya qetilkirina Jîna Emînî ragihandin, di meha 9'emîn a girtina xwe de derketin pêşberî dadgehê.

	 

	Rojnamevan Nîlûfer Hamedî yekemîn kesa ku nûçeya Jîna Emînî ya di 16’ê Îlona 2022’an de li Îran û Rojhilatê Kurdistanê ji aliyê ‘polîsên exlaqê’ ve hat qetilkirin ragihand û Elaha Mohammadî ya di merasîma cenazeyê de dirûşma "Jin jiyan azadî" ji cîhanê re ragihand, di meha 9’emîn a girtîna xwe de derketin pêşberî dadgehê.

	 

	Yekemîn danişîna doza nûçegihana rojnameya Hamamîhan Elaha Mohammadî roja 29’ê Gulanê li Şaxa 15’emîn a Dadgeha Şoreşê yê bi serokatiya Ebûlqasem Selavatî hat dîtin. Dema li dadgehê parêzera rojnameger amade bû, danişîn ji çapemeniyê re girtî hat dîtin. Parêzera rojnameger Şahab Mîrlohî danişîna ewil "erênî" nirxand, diyar kir ku roja danişîna din nehatiye diyarkirin.

	 

	Doza Nîlufer Hamedî îro ye

	 

	Yekemîn danişîna doza nûçegihana Rojnameya Şerq Nîlûfer Hamedî ya piştî girtina 9 mehan tê darizandin, li heman şaxa Dadgeha Şoreşê ya Tahranê tê dîtin.

	 

	Rojnameger Mîna Akberî li ser medyaya dîjîtal ragihand ku gelek rojnamevan û çalakvanên sivîl bi malbata Elaha Mohammadî re li ber avahiya edliyeya li Kolana Muelem a Tahranê kom bûne. Di parvekirinê de wiha hat gotin: “Xwedawend di saet 9.40’an de bi wesayiteke cama reş anîn, lê destûr nedan ku kes nêzî wesayîte bibe.”