‘Em tertela Dêrsîmê jibîr nakin, nadin jibîrkirin’ 2023-05-04 21:16:14   DÊRSÎM - Saziyên Elewî di 86'emîn salvegera Terteleya Dersimê de daxuyanî dan û gotin: "Me Terteleya Dersimê ji bîr nekiriye, em ê nehêlin bê jibîrkirin. Em ê ji bo îadekirina navê Dersimê bixebitin."    Bi pêşengiya Platforma Ked û Demokrasiyê ya Dersimê, li Qada Seyîd Riza têkildarî 86'emîn salvegera Terteleya Dersimê daxuyanî hat dayîn. Nûnerên Rêxistina Partiya Çep a Kesk a Dersimê û rêxistinên navçeyan, nameta parlementeriyê ya bajêr Ayten Kordû, namzetê parlementeriyê yê Amedê Azad Bariş, Hevseroka Partiya Demokratîk a Gelan (HDP) a Amedê Gulîstan Atasoy, Serokê Baroya Amedê yê ber Cîhan Aydin, pêkhateyên Tifaqa Ked û Azadiyê, Hevserokên Giştî yên Komeleyên Elewî yên Demokratîk (DAD) Kadriye Dogan û Mûsa Kûlû û pîrên elewî tevlî daxuyaniyê bûn.    Li ser navê platformê Serokê Partiya Kedê (EMEP) ê Dersimê Ergîn Tekîn metna daxuyaniyê xwed. Tekîn bal kişand ser dîrokçeya komkujiyê û got ku ev komkujî niha jî didomin.     Ergîn di berdewama daxuyaniyê de ev daxwaza bi rêz kirin:   "*Bila bi awayekî fermî lêborîn bê xwestin,    *Bila arşîvên têkildarî pêvajoya 1937/38/39'an û heqîqet bi temamî bi raya giştî re bê parvekirin,     *Bila ji bo îadekirina îtibar mafên xizmên windayan daxuyaniyeke fermî bê dayîn,     *Bila cihê windayan (zarok, jin, extiyar) bê vekolandin û bila ji bo tespîtkirina nasnameyên kesên kuştî lêkolîn bê kirin,     *Bila navê Dersimê û navê cihên din bên îadekirin,     *Bila cihê gora Seyîd Riza û yên hatine bidarvekirin bê eşkerekirin,     *Bila Komkujiya Dersimê wekî 'qirkirinê' bê naskirin."    Piştre Hevserokê Giştî yê Federasyona Komeleyên Dersimê (DEDEF) Ozkan Tacer, li ser navê Dadê Zeynel Kete, Serokê Giştî yê Komeleya Çandê ya Pîr Sûltan Abdalê (PSAKD) Cûma Erçe, Serokê Giştî yê Federasyona Elewî-Bektaşî (ABF) Mûstafa Aslan û herî dawî jî namzeta parlementeriyê ya Partiya Çepên Kesk a Dersimê Ayten Kordû axivî.    Di axaftinan de hat desthnîşankirin ku divê dewlet bi gel re bê rû hev û lêborînê bixwaze û wiha dawî lê anîn: "Me Terteleya Dersimê ji bîr nekiriye, em ê nehêlin bê jibîrkirin. Em ê ji bo îadekirina navê Dersimê bixebitin."