PENa Kurd: Wê tu kes nikaribe heqîqetê û çapemeniya azad bêdeng bike 

2023-04-29 16:10:47


	 

	 

	 

	NAVENDA NÛÇEYAN - PENa Kurd bertek nîşanî binçavkirin û girtinan da û wiha got:"Wê tu hêz nikaribe mafê girtina nûçeyan a civakê asteng bike. Wê tu kes nikaribe rastî, heqîqet û çapemeniya azad bêdeng bike."

	 

	PENa Kurd, têkildarî operasyonên navenda wê Amed û li 21 bajarî hat kirin û operasyona vê serê sibehê navenda wê Enqere pêk hat daxuyanî da. PENa Kurd di daxuyaniya xwe de wiha got:"Ji bo ev êrişana bisekinin jî divê em bi yek dengî tev bigerin, hemû rojnameger û rêxistinên pîşeyî yên rojnamegeran bertekê nîşanî van girtinan bidin. Em bang li raya giştî dikin ku li dijî operasyonên mafê  azadiya ramanê binpê dikin dengê xwe bilind bike."

	 

	Di dewamiya daxuyaniyê de wiha hat gotin:

	 

	"Li Bakurê Kurdistanê êriş û zextên li dijî xebatkarên çapemeniya azad dewam dikin. Rojnamegerên li dû rastiya heqîqetê hema bêje her roj tên binçavkirin û girtin. Di 11 mehên dawî de gelek caran operasyon li dijî rojnamegeran hat kirin. Di çarçoveya lêpirsîneke Serdozgeriya Komarê ya Amedê de li 21 bajaran der barê 216 kesan de biryara binçavkirinê hatibû dayîn. Ji van kesan 144 kes hatibûn binçavkirin. Ji kesên binçavkirî 48 kes hatin girtin. Di nava kesên hatin binçavkirin de rojnameger, siyasetmedar, hunermend û parêzer hene. Rojnameger Mehmetşah Oruç, Bêrîtan Canozer, Abdurrahman Gok û Remzî Akkaya bi îdiaya “endamtiya rêxistinê” hatin girtin. Her wiha îro dîsa di çarçoveya lêpirsîna navenda wê Enqere de Hevseroka DFG’ê Dîcle Muftuoglu û Edîtorê Ajansa Mezopotamyayê Sedat Yilmaz, hatin binçavkirin. Niha hilbijartinên 14’ê Gulanê nêz dibin û ji bo îktidara AKP-MHP’ê bi ser bikeve jî zext û êrişên xwe zêde dikin. 

	 

	Di 8’ê Hezîrana 2022’yan de di çarçoveya lêpirsîna serdozgeriya komarê ya Amedê daye destpêkirin de midûra ajansa JINNEWS’ê Safiye Alagaş jî tê de 22 kes hatin binçavkirin û di 16’ê hezîranê de 16 rojnameger hatin girtin. Îdianameya rojnamegeran 10 meh şûnde hat amadekirin û rûniştina yekem wê di 11’ê Tîrmehê de bê dîtin.Di 29’ê cotmeha 2022’yan de jî di çarçoveya lêpirsîneke cuda ya serdozgeriya komarê ya Enqereyê da destpêkirin de midûra karê nivîsan a ajansa Mezopotamyayê Dîren Yurtsever, nûçegîhan Berîvan Altan, Ceylan Şahînlî, Denîz Nalim, Emrullah Acar, Hakan Yalçin, Selman Guzelyuz, nûçegîhanên JINNEWS’ê Habîbe Eren û Oznur Deger hatin girtin. Rûniştina 9 rojnamegeran wê di 16’ê Gulanê de bê dîtin. 

	 

	Îktidara AKP-MHP’ê ya heyî çapemenî kiriye bin kontrola xwe û bi vê yekê re zimanekî êrişkar, cudakar û zayendperest bi kar tîne. Ev yek jî bingeha tundiya li ser jinê û civakê ava dike û dibe sedem ku jin û civak hîn zêde bên çewisandin. Ji bo qirêjî û kêmasiyên vê iktidara heyî dernekeve jî çapemeniya azad hedef tê girtin. Bi operasyona herî dawî ya li dijî çapemeniya azad, hunermed, siyasetmedar û parêzeran eşkere xuya dike ku ev di heman demê de jî amadekariya îktidara heyî ya ji bo hilbijartinên 14'ê Gulanê ye. Ev îktidar ji bo di hilbijartinê de bi ser bikeve operasyonên çavtirsandinê û çewisandinê pêk tîne. Lê belê gelê kurd hêza xwe ji kevneşopiya xwe ya têkoşer digire û heta niha tu carî serî netewandiye. Wê ji niha şûnde jî serî netewîne û gavê paşde neavêje. 

	 

	Sîstema heyî ya ku dixwaze kar, xebat û çalakiyên tên kirin krîmînalîze bike her tim ji êrişên li ser çapemeniya azad re dest pê kiriye. Heta niha kîja îktidara hatibe di destpêkê de êrişî rojnamegeran û çapemeniya azad kirine. Ev jî qarneyê vê sîstema heyî ya tarî derdixe holê. Bi awayekî derhiqûqî û bi îddiayên pûç û vala xebatkarên çapemeniya azad tên cezakirin. Rojnameger Abdurrahman Gok ê ku li Amedê hat girtin bi wêneyê Kemal Kurt ê kişand rastiyeke mezin derxist holê. Bi wî wêneyî hat eşkerekirin ku Kemal ji aliyê polîsan ve hatiye qetilkirin. Dîsa Rojnameger Bêrîtan Canozer û Safiye Alagaş bi salan e dibin dengê hemû jinên cîhanê. Her wiha Ahmet Kanbal jî tarîtiya 30 salan a li şaredariyên ku qeyûm tayînî ser wan hat kirin derxist holê. Ji ber rojnameger rastiyê derdixin holê ji ber ku kêmasî û neheqiyên îktidara heyî derdixin holê loma jî bûn hedef. Ev sîstema heyî bi salan e di bin navê “endamtiya rêxistinê, propagandaya rêxistinê” de dixwaze rojnamegeran asteng bike û dengê civakê nedin bihîstin. Herî dawî jî zagona dezenformasyon ango zagona sansurê hat derxistin û bi vê re hat xwestin rojnameger bên eciqandin, bêdeng bimînin û nema karê xwe bikin. Li dijî van hemû zext û zordestiyan rojnamegeran gotin, “Em ê karê hevalên xwe nîvco nehêlin, em ê pênûsa hevalên xwe li erdê nehêlin.” Em jî wekî PENa Kurd dibêjin em ê xwedî li ked, xebat û têkoşîna rojnamegerên çapemeniya azad derkevin. 

	 

	Ji bo ev êrişana bisekinin jî divê em bi yek dengî tev bigerin, hemû rojnameger û rêxistinên pîşeyî yên rojnamegeran bertekê nîşanî van girtinan bidin. Em bang li raya giştî dikin ku li dijî operasyonên mafê  azadiya ramanê binpê dikin dengê xwe bilind bike. Li dijî operasyonên qirkirina siyasî, operasyonên hilbijartinê wê têkoşîna gelê kurd dewam bike. Wê tu hêz nikaribe mafê girtina nûçeyan a civakê asteng bike. Wê tu kes nikaribe rastî, heqîqet û çapemeniya azad bêdeng bike."