Li Îzmîrê yekemîn buroya hilbijartinê ya jinan hat vekirin

2023-04-14 19:37:58


	 

	ÎZMÎR - Namzetan di vekirina buroya hilbijartinê ya jinan de axivîn û diyar kirin ku jin dê jiyana nû ava bikin û gotin “An azadî yan azadî.”

	 

	Partiya Çep a Kesk yekemîn buroya hilbijartinê ya jinan li ketina taxa Egekentê ya Navçeya Çigliyê vekir. Buroya hilbijartinê ya jinan bi alên Partiya Çep a Kesk bi balonên mor hat xemilandin. Ji bilî wêneyên siyasetmedarên jin ên girtî Denîz Poyraz, Nagihan Akarsel û Jina Amini, pankartên ”Dîsa Jin Dîsa Jiyan", "Na ji tundiya mêr-dewletê re", "Peymana Stenbolê me zindî dihêle", "Em dest ji xwe bernadin. maf û jiyan", "Em ê ji qatilan hesab bipirsin", "Ji bo heqîqetê edalet" û "Ji her cure tundiya li ser jinê re na" hatin daliqandin.

	 

	Parlamentera Partiya Demokratîk a Gelan (HDP) ya Îzmîrê Sepîl Kemalbay, namzetên jin Burcugul Çubuk, Canan Kebenç Ozkan, Aysel Önen Turan, Gift Korkut, Hevseroka HDP'ê ya Îzmîrê Berna Çelîk û gelek jin beşdarî vekirinê bûn. Di vekirinê de ku govend hat gerandin û  bê navber dirûşmeyên "Jin jiyan azadî" hatin berzkirin.

	 

	Hevseroka HDP'ê ya Îzmîrê Berna Çelîk di vekirinê de axivî û diyar kir ku civakeke ku jin lê azad nebe ne azad e û got, "Ji bo hilbijartinan her roj malên xwe biterikînin, li kolan û qadan bixebitin. Em deyndarê civakê ne û em ê di 15'ê Gulanê de ala xwe ya azadiyê bilind bikin. Yan azadî, yan jî azadî." 

	 

	Piştre Parlamentera HDP'ê ya Îzmîrê Serpîl Kemalbay axivî û diyar kir ku hilbijartineke dîrokî pêk hatiye û wiha axifî, "Jin wê vê hikûmetê bişînin. Em li vir in ku rejîma Erdogan bavêjin çopa dîrokê."

	 

	Namzeta Partiya Çep a Kesk a Îzmîrê Canan Kebenç Ozkan diyar kir ku jiyana jinan hatiye desteserkirin û wiha bi lêv kir, "Em li ser rêya avakirina jiyaneke nû bi azadiya jinê û keda jinê ne. Azadiya hevalên me yên jin ên di zindanan de erka me ye.” 

	 

	Namzet Burcugul Çubuk jî wiha nêrînê xwe anî ziman, "Em ê hesabê Denîz Poyraz û Fatma Altinmakas bi vê hêzê bipirsin. Em ê zindan û qesrên dewleta mêr jî hilweşînin." 

	 

	Aysel Onen Turan û Gift Korkut diyar kirin ku dê jin di hilbijartinê de bi ser kevin.

	 

	Piştî axaftinan buroya hilbijartinê bi dirûşmeya "Jin jiyan azadî" hat vekirin.