
Li Mêrdînê bi girseyî namzet hatin pêşwazîkirin 

2023-04-13 17:02:36


	&nbsp;

	MÊRDÎN - Li Mêrdînê bi girseyeke mezin namzetên Partiya Çepên Kesk hatin pêşwazîkirin û nasandin. Namzeta Partiya Çep a Kesk û Hevseroka Giştî ya DBP’ê Salîha Aydenîz axivî û anî ziman ku ew ê 6 û 0 derbixin û faşîzmê bixin bin sindoqan.

	&nbsp;

	Li Mêrdînê namzetên Partiya Çepên Kesk ên bi girseyî hatin pêşwazîkirin. Beriya hatina namzetan girseyê govend gerand. Piştre namzet, li Tesîsên Sultan Şehmûs a navçeya Artûklû ya Mêrdînê hatin pêşwazîkirin û bi sedan wesayît tev li konvoya pêşwazîkirinê bûn. Namzetên Partiya Çepên Kesk ên Mêrdînê Saliha Aydenîz, Bêrîtan Guneş, Leyla Kaya, Kamuran Tanhan, Selahattîn Ertaş û George Aslan, rêvebirên HDP’ê, nûnerên rêxistinên civaka sivîl û gelek welatî tevli konvoyê bûn.

	&nbsp;

	Wesayîtên bi alên Partiya Çepên Kesk hatin xemilandin, di serî de li navçeya Qoserê bi stranên hilbijartinê tûreke avêtin. Gel eleqeyeke zêde nîşanî namzetan da. Zarok û ciwanan bi duçerxê tevlî konvoyê bûn û şopandin, jinan jî di pace, şaneşîn û kolanan de bi nîşaneya serkeftinê û tililiyan konvoyê pêşwazî kirin. Li Qada Azadiyê ya Qoserê ku bi hezara kes kom bûn bi coşek mezin konvoyê pêşwazî kirin. Li vê derê namzetên Partiya Çep a Kesk li ser otobusê sliav dan welatiyan. Piştî tura ku navçeyê qediya ber bi Mêrdînê ve bi heman awayî çûn.

	&nbsp;

	Bi eleqeyek mezin namzet hatin pêşwazîkirin

	&nbsp;

	Konvoy heta Mêrdînê bi stranan hat û li vê derê jî bi eleqeyek mezin hatin pêşwazîkirin. Konvoya ku gihîşt Mêrdînê berê xwe da li ber avahiya HDP’ê ya Mêrdînê û li vir girseya ku kom bû bi çepik, tililî û dirûşma “Em ê bi berxwedanê bi ser kevin” pêşwazî kir. Li vê derê namzet hatin nasandin. Piştre namzeta Partiya Çep a Kesk û Hevseroka Giştî ya DBP’ê Salîha Aydenîz axaftinek kurt kir.

	&nbsp;

	‘Em ê 6 û 0 derxin’

	&nbsp;

	Salîha, anî ziman ku gelê Mêrdînê bi coş û kelecana xwe biryara xwe ji zû de daye û wiha got: “Gelê Mêrdînê wê 6 û 0 derbixe. Me vê biryariyê ji gelê xwe de dît. Gelê Kurd sed salan in li berxwe dide. Em wek namzetên Mêrdînê ji bo azadiya Gelê Kurd, wekheviyê, zimanê kurdî, pêşeroja Gelê Kurdistanê em ê meclîsê bihejînin. Em ê biryarbûna Mêrdînê nîşan bidin. Em bi salan in li berxwe didin û heta 14’ê Gulanê jî em ê li berxwe bidin. 14’ê Gulanê ji bo pêşeroja Tirkiyeyek demokratîk û Kurdistaneke azad em ê li berxwe bidin. Em ê faşîzmê bikin bin sindoqan.”

	&nbsp;

	Bername bi tililî û çepikan bi dawî bû.&nbsp;

	&nbsp;