
Komîteya Lêpirsînê ya NY'yê rapora xwe aşkera kir  

2023-03-23 16:14:37


	&nbsp;

	&nbsp;

	NAVENDA NÛÇEYAN - Komîteya Lêpirsînê ya Neteweyên Yekbûyî ya Taybet, derbarê binpêkirina mafên welatiyan de raporek ji 44 rûpelan pêk tê weşand û diyar kir ku ev kiryar dikeve asta sûcên dermirovî.

	&nbsp;

	Komîteya Lêpirsînê ya Neteweyên Yekbûyî (NY) ya taybet ji bo Sûriyeyê der barê binpêkirinên çeteyên girêdayî dewleta Tirk de raporek ji 44 rûpelan weşand.

	&nbsp;

	Komîteyê diyar kir ku endamên "Artêşa Niştimanî ya Sûriyeyê'' girtin, biçavkirin, windakirina bi zorê, îşkence, tewazîkirin, nêzîkatiyên xirab, birina rehînan û talankirinê berdewam dikin. Komîteyê da zanîn ku ev kiriyar dighêjin asta sûcên dermirovî.

	&nbsp;

	Komîteyê di raporê de bal kişand ser gefxwarinên li niştecihên resen ên Efrînê yên ku daxwaza vegerandina malên xwe dikin, revandina dûbare ya şêniyan û standina fidiyê li beramberî serbestberdana wan. Komîteyê îşaret bi vê yekê kir ku "Polîsên sivîl" li Efrînê parêzerekî kurd di bin îşkenceyê de qetil kir.

	&nbsp;

	Komîteya Lêpirsînê ya Neteweyên Yekbûyî ya Taybet ji bo Sûriyeyê da zanîn ku çeteyên Heyet Tehrîr El Şam û "Artêşa Nîştimanî ya Sûriyeyê'' tecawiz û êrişên zayendî dikin. Komîteyê ev yek bi sûcên şer bi nav kir.

	&nbsp;

	Komîteyê derbarê sûcên destdirêjiyê de mînak parve kirin û got, çeteyên "Artêşa Nîştimanî ya Sûriyeyê" li Serêkaniyê tecawizê zarokekî iraqî kir û li bajarê Babê yê dagirkirî jineke ducanî û hevjînê wê yê rojnamevan qetil kirin.

	&nbsp;

	Di raporê de hate gotin ku çeteyên Heyet Tehrîr El Şam biçavkirina sivîlan didomînin û girtî xwarin û dermanên têrker bidest naxin.

	&nbsp;

	Li gorî raporê, çeteyên Heyet Tehrîr El Şamê qetilkirina girtiyan, di nav de girtiyên jin didomîne û çavdêriya li karên rêxistinên xwecih û ragihandinê asê dike.

	&nbsp;