
Serhildana ‘Jin, Jiyan, Azadî’ didome 

2023-03-17 11:58:14


	&nbsp;

	NAVENDA NÛÇEYAN - Bi ser serhildana li Rojhilatê Kurdistan û Îranê ya li dijî desthilata Îranê re 6 meh derbas bûn, tevî zext, kuştin, darvekirinan jî serhildana gelên Rojhilat û Îranê bê navber dewam dike.

	&nbsp;

	Serhildana ‘Jin, Jiyan, Azadî’ ya li Rojhilatê Kurdistan û Îranê ya piştî qetilkirina jina ciwan a Kurd Jîna Emînî dest pê kir, bê naver dewam dike.

	&nbsp;

	Weke kevneşopiyek her roja pênçşemê xelk diçin ser goristanan û ji bo xizmên xwe duayan dixwînin. Lê li Rojhilat û Îranê ev kevneşopî jî vegeriyaye serhildanan. Kesên di xwepêşandanan de jiyana xwe ji det dane, bi girseyî li ser gorên xwe tên bibîranîn û piştî wê jî xwepêşandan tên lidarxistin.

	&nbsp;

	Li bajarê Seqîz bi dehan kes çûn ser gora Jîna Emînî û bê navber dirûşma ‘Jin, Jiyan, Azadî’ qêriyan. Li bajarê Sine jî tevî hêzek zêde ya leşkerî, bi sedan kes çûn ser goristanan û bi merasîmên cûda kesên hatine kuştin bi bîr anîn.

	&nbsp;

	Bi heman awayî li bajarê Kamyaran, Dîwandere, Bokan, Mihabad, Kirmaşan û çend bajarên din merasîmên bibîranînê hatin lidarxistin.

	&nbsp;

	Li ser asta Îranê jî, li bajarên Tahran, Kerec, Terwêz, Esfehan û çend barajên din xelk daketin qadan û dijî desthilatê dirûşme qêriyan.

	&nbsp;

	Dijî cezayên darvekirinê, li bajarê Urmiyeyê komek xizmên girtiyên ku cezayê darvekirinê lê hatine birîn, çalakiyek li ber derê girtîgeha bajar derxistin.

	&nbsp;

	Duh Rêxistina Mafê Mirovan a Îranê ragihand ku di 15 rojên destpêkê yên meha Sibatê de 29 kes li Îran û Rojhilatê Kurdistanê hatine darvekirin. Her wiha ji destpêka salê ve bi giştî hejmara kesên hatine darvekirin gihiştiye 138 kesan.

	&nbsp;

	Desthilata Îranê ji bo dawî li serhildanê bîne, destpêkê girtin, êşkencekirin, darvekirin serî li hemû rêyan dide. Lê tevî hemû zextan jî xelk daxwaza azadiyê dikin.

	&nbsp;