Serhildana 'Jin jiyan azadî' didome  

2023-03-01 12:13:19


	 

	 

	NAVENDA NÛÇEYAN - Serhildana ‘Jin, Jiyan, Azadî’ ya li Rojhilatê Kurdistan û Îranê 167 roj li pey xwe hiştin. Tevî gefên kuştin, darvekirin, girtin û îşkenceyan jî bi awayên cuda nerazîbûna xelkê li Rojhilatê Kurdistan û Îranê di dome.

	 

	Serhildana li Rojhilatê Kurdistan û Îranê tevî kuştin, darvekirin, girtin û êşkenceyan jî bê navber dewam dike. Duh li hin bajarên Rojhilatê Kurdistan û Îranê xanenişînan li dijî rewşa xirab a jiyanê xwepêşandan li dar xistin. Her wiha xwendekarên zanîngehan jî li qadan bûn.

	 

	Di vê çarçoveyê de duh li bajarên Kirmaşan, Îlam, Sine, Merîwan û çend bajarek din ên Rojhilatê Kurdistanê xanenişînan (Teqawîtbûyan) li dijî rewşa xirab a  jiyanê û kêmiya muçe xwepêşandan li dar xistin.

	 

	Bi heman armancê li bajarên Kirman, Şehir Kurd, Yezd, Erdebêl, Erak, Reşt, Qezwîn, Tewrêz, Esfehan û Sarî xanenişîn meşiyan û daxwaza mafên xwe kirin.

	 

	Li Tehranê jî xanenişînan xwestin li ber derê parlamentoyê nerazîbûn nîşan bidin, lê hêzên rejîmê dor li wan girtin û rê nedan ew xwepêşandan li dar xin.

	 

	Duh li hin zanîngehên Tehran û Esfehanê xwendekar li dijî zextên hêzên ewlehiyê û peydanekirina xizmetguzarî û xurakê xwepêşandan li dar xistin.

	 

	Li aliyê din duh di çarçoveya piştgiriya navdewletî ya bi serhildana ‘Jin, jiyan, azdî’ re 54 welatên endamên Encûmena Mafê Mirov a Neteweyên Yekbûyî bi daxuyaniyek hevbeş bang li Îranê kirin ku dawî li darvekirina xwepêşanderan bîne û rêz li maf û azadiyan bigire.

	 

	Her wiha duh jî Encûmena Qelema Navneteweyî ku zêdetirî 30 şaxên wê li seranserî cîhanê hene, bi daxuyaniyekê bang li rayedarên Îranê kir ku tevayî helbestvan, rewşenbîr û kesên ji ber nivîsîn, wergêr an jî dijderketina sansurê hatine girtin, demildest werin berdan.