Kongra Star a Helebê encamnameya kongreyê nîqaş kir

2023-01-25 21:14:58


	 

	NAVENDA NÛÇEYAN- Kongra Star a Helebê civînek li taxa Şêxmeqsûd a Helebê li darxist û  encamnameya 9’emîn kongreya ku li Hesekê hatibû lidarxistin, nîqaş kir.

	 

	Kongra Star a Helebê ji bo nîqaşkirina encamnameya 9’emîn kongreya xwe civînek li salona civînan a taxa Şêxmeqsûd a Helebê li darxist. Endam û nûnerên saziyên sivîl, partiyên siyasî, komîn û meclisê tevli civînê bûn.

	 

	Di serî de endama Koordînasyona Kongra Star a Helebê Amne Xidiro perspektîfên Rêberê PKK’ê  Abdullah Ocalan ên der barê têkoşîna jinan de xwendin.

	 

	Piştre sînevîzyonek li ser dîroka têkoşîna jinan a li hember pergalên xwedî hişmendiya baviksalariyê û kevneperestiya li nav civakan, her wiha li ser xebatên rêxistinî yên Kongra Star ên li ser asta Bakur û Rojhilatê Sûriyê hat pêşandan.

	 

	Her wiha, Amne Xidiro rapora salê ya Kongra Star a li ser asta Bakur û Rojhilatê Sûriyê xwend û got: "Xurtkirina neteweya demokratîk di warê siyasî de ji bo biserxistina şerê gel ê şoreşgerî û pêşxistina neteweya demokratîk bi giştî girîng e. Di heman demê de jî ji bo pêşxistina pergala konfedralîzma jinan û biserxistina têkoşîna jinan jî girînge."

	 

	Di dawiya civînê de rapora xebatên Kongra Star û encamnameya konferansa wê ya 9'emîn ji bo pratîkkirina wê hatin xwendin.