Doza xelatkirina JIN TV hat taloqkirin

2023-01-13 14:34:53


	 

	 

	ENQERE - Dadgehê di danişîna doza rêveberên Odeya Avahîsazan ku xelat dabûn Jin TV û ji ber vê tên darizandin, biryarên Dadgeha Bilind û AYM’ê li ber çavan negirt, daxwaz red kirin û doz taloq kir. 

	 

	Rêveberiya Odeya Avahîsazan a Şaxa Enqereyê li ser navê bîranîna avahîsaz Emre Madran xelata çapemeniyê ya sala 2021’ê di beşa Nûçegihaniya Telvîzyonê ya Navnetewî de dabû pêşkêşvana Jin TV Guler Yildiz. Bi hêceta vê xelatê derbarê endamên Rêveberiya Odeya Avahîsan de bi îdiaya “propagandaya rêxistinê” doz hatibû vekirin. Danişîna dozê li 25’emîn Dadgeha Cezayê Giran a Enqereyê hat kirin. Rêveberên odeyê û parêzerên xwe di danişînê de amade bûn û gelek nûnerên rêxistinên siyasî û sivîl tevli danişînê bûn. 

	 

	Mutalaya berê hat dubarekirin 

	 

	Ji parêzerên dozê Tûrgût Kozan li dijî mutalayê axivî û biryarên emsal ên Dadgeha Destûra Bingehîn pêşkêşî heyeta dadgehê kir û xwest li Heyeta Pispor bê guhdarîkirin.Turgut Kozan bertek nîşanî mutalaya dozger da û got: “Dozger bêyî biryarên Dadgeha Bilind bixwîne, mutalaya xwe dubare dike. Ev çawa dadgehek kolektîfî ye. Dozger biryarên Dadgeha Bilind tune dihesibîne. Biryara AYM’ê ya ji bo Akademîsyenên Aştiyê da, ji bo vê dozê jî emsal e. Xelata bo Jin TV tu tundiyê di xwe de nahebîne.”

	 

	Dozger vekolîn red kir

	 

	Dozger daxwaza firehkirina vekolînê red kir û xwest dema zêde bê dayîn. Heyeta dadgehê daxwaza dema zêde ya bo parastinê qebûl kir û hemû daxwazên din red kir û danişîn taloqî 22’ê sibatê kir.