Ciwanên Kobanê li dijî êrişan daketin qadan 

2022-12-31 15:17:27


	 

	KOBANÊ - Ciwanên Kobanê li dijî êrişan daketin qadan û gotin:"Heta em rêber Abdullah Ocalan bi fîzîkî azad nekin em nasekinin û em ê heta serkeftinê bi gerîla re bin."

	 

	Ciwanên Meclisa Malbatên Şehîdan a herêma Firatê bi dirûşma "Destdirêjiya li ser nirxên me sedema tolhildanê ye" xwepêşandanek li dar xist. Ciwanan sûcên dewleta tirk û komên girêdayî wê yên li herêmên dagirkirî û destdirêjiya li goristanên şehîdan şermezar kirin.

	 

	Xwepêşandanê ji deriyê başûr ê têketina bajarê Kobanê dest pê kir. Tê de alên Meclisa Malbatên Şehîdan hatin hildan û dirûşmên şermezarkirina sûcên dewleta tirk hatin berzkirin.

	 

	Li Goristana Şehîd Dîcle, xwepêşandan veguherî mîtîngê. Endamê rêveber ê Ciwanên Meclisa Malbata Şehîdan a herêma Firatê Hecî Kolagasî sûcên dewleta tirk şermezar kirin û wekî sûcên derveyî mirovahiyê yên dikevin asta sûcên şer bi nav kirin.

	 

	Hecî diyar kir ku dewleta tirk û komên girêdayî wê bi awayekî hovane destdirêjiyê li goristanên şehîdan dikin û bêdengiya hêzên navneteweyî ya li hember wan kiryaran şermezar kir û got: “Heta niha tu rêxistineke hiqûqî tiştek nekiriye.”

	 

	Hecî bal kişand ser sûcên dewleta tirk ên bikaranîna çekên kîmyewî li djiî têkoşerên azadîyê û wiha got: "Heta em rêber Abdullah Ocalan bi fîzîkî azad nekin em nasekinin û em ê heta serkeftinê bi gerîla re bin."

	 

	Xwepêşandan bi dirûşmên "Berxwedan jiyan e" bi dawî bû.