
Serhildana gel a Rojhilatê Kurdistan û Îranê dewam dike 

2022-11-21 12:36:30


	&nbsp;

	&nbsp;

	&nbsp;

	NAVENDA NÛÇEYAN - Serhildana gel a li Rojhilatê Kurditan û Îranê ya li dijî rejîma Îranê tevî êrişan bê navber dewam dike.&nbsp;

	&nbsp;

	Tevî zext û êrişên dewletê, serhildana gelên Rojhilatê Kurdistan û Îranê dewam dike. Hate ragihandin ku şeva borî 8 xwepêşander jiyana xwe ji dest dan.

	&nbsp;

	Li Rojhilatê Kurdistan û Îranê xwepêşandan û çalakiyên di 16’ê Îlonê de bi qetilkirina jina Kurd Jîna Emînî re destpêkirin, tevî girtin, qetilkirin, darvekirin, tundî û îşkenceyan berdewam in.

	&nbsp;

	Li gorî dîmenên di medyayên dîjîtal hatin belavkirin duh li bajarên Pîranşar, Serdeşt, Bokan, Mihabad, Sine, Seqîz, Merîwan, Dêwlan, Kamyaran, Dîwandere, Pawe, Ciwanro, Kirmanşan, Îlam û Urmiye xwepêşandan berdewam bûn.

	&nbsp;

	Li gorî çavkaniyên ajansên nûçeyan yên Rojhilatê Kurdistanê duh di xwepêşandanan de 8 xwepêşander li bajarên Sine, Ciwanro, Pîranşar, Merîwan û Dêwlan di encama gulebarana raste rast ya hêzên rejîmê de jiyana xwe ji dest dane.

	&nbsp;

	Nasnameya xwepêşanderên jiyana xwe ji dest dane wiha ne:

	&nbsp;

	Li bajarê Pîranşar; Karwan Qadir Şukrî û Tahîr Ezîzî

	&nbsp;

	Li bajarê Ciwanro; Luqman Kakeyî, Îrfan Kakeyî û Bihadîn Weysî

	&nbsp;

	Li bajarê Sine; Hisên Abid Pane

	&nbsp;

	Li bajarê Merîwan; Star Rehîme

	&nbsp;

	Li bajarê Dêwlan; Muhsin Niyazî

	&nbsp;

	Her wiha xwepêşandan û çalakiyên xwendevanên zanîngehan jî bi heman şêweyî berdewam bûn û heta direngiya şevê li qadan bûn.

	&nbsp;

	Hêjayî gotinê ye ku hêzek mezin a hêzên rejîma Îranê li bajarên weke Mihabad, Bokan, Merîwan, û Pîranşar hatiye komkirin.

	&nbsp;

	Li gorî bilançoyên xwepêşandanên 5 rojên borî, li Rojhilatê Kurdistanê nêzîkî 30 xwepêşanderan hatine kuştin.

	&nbsp;

	Li ser asta Îranê jî li bajarên weke Tehran, Bane, Esfehan, Şîraz û hinek bajarên din xwepêşandan û çalakiyên xwepêşanderan berdewam bûn. Di xwepêşandanên li bajarê Tehranê de piştgirya ji bo xwepêşanderên li Kurdistanê hat dubare kirin.

	&nbsp;

	Di heman demê de Melayê Sunnî Mewlewî Ebdulhemîd yê li Zahîdanê li ser rewşa bajarên Rojhilatê Kurdistanê nerazîbûna xwe anî ziman û hişyarî da ku zext, tundî û kiryarên zordarên desthilatdaran wê bibe sedema berfirehbûna xwepêşandanan.

	&nbsp;

	Duh Navenda Ragihandina Deshilatdariya Dadweriya Îranê ragihand ku li ser xwepêşanderek yê bajarê Tehranê cezayê darvekirinê hatiye birrîn. Di nava hefteya borî de ev kesê 6’ê ye ku cezayê darvekirinê lê tê birîn.

	&nbsp;

	&nbsp;