Komeleya Tiba Edlî ya Elmanyayê xwest Şebnem Korur Fincanci bê berdan 

2022-11-01 14:29:06


	 

	 

	NAVENDA NÛÇEYAN - Komeleya Tiba Edlî ya Elmanyayê bi daxuyaniya da xwest Şebnem Korur Fincanci bê berdan.

	 

	Komeleya Tiba Edlî ya Elmanyayê nerazîbûn nîşanî girtina Prof. Şebnem Korur Fîncanci da û xwest derbarê îxtîmaleke binpêkirina qedexeya çekên kîmyewî de lêpirsînek serbixwe bê kirin.

	 

	Di daxuyaniya nivîskî ya komeleyê de hat ragihandin ku girtina Şebnem Korur Fîncanci piştî daxuyaniyên wê yên ku gotibû dibe ku artêşa Tirk li Başûrê Kurdistanê çekên kîmyewî bi kar aniye,bûye sedema guman û hêrseke mezin û hat destnîşankirin ku daxuyaniyên Fîncancî di çarçoveya prensîbên bingehîn ên azadiya raman û tiba edlî de ne.

	 

	Di daxuyaniya komeleyê de hat gotin, "Di vê çarçoveyê de em dixwazin ku Profesor Şebnem Korur Fîncanci demildest bê berdan û em piştgiriyê didin daxwaza lêkolîneke serbixwe ya berfireh a derbarê binpêkirina qedexeya çekên kîmyewî de."