PENa Kurd ji bo Jîna Emînî daxuyanî da 

2022-09-19 14:29:57


	 

	 

	NAVENDA NÛÇEYAN - PENa Kurd di daxuyaniya xwe de bal kişand ser kuştina bi rêya îşkenceyê ya Jîna Emînî ya li Tehrana Îranê û wiha got:"Di sînorên desthilatdariya vê rejîmê de jin bi awayên cuda tên çewisandin û her roj di bin metirsiya girtin, destavêtin û kuştinê de ne. Em hevxemiya xwe bi malbata Jîna Emînî û gelê azadîxwaz ên Kurdistanê re parve dikin."

	 

	Jîna Emînî ya ji Seqizê li Tehranê ji aliyê polîsên ehlaqê yên Rejîma Îranê ve bi hinceta laçika xwe baş nedaye serê xwe bi îşkenceyê hat kuştin. PENa Kurd têkildarî mijarê daxuyanî da û got azadî mafê rewa yê her mirovî ye û ger jin azad nebe civak jî azad nabe.

	 

	Di dewamiya daxuyaniyê de wiha hat gotin:

	 

	"Azadî mafê rewa yê her mirovî ye û ger jin azad nebe civak jî azad nabe.

	 

	Rejîma Komara Îslamî ya Îranê di heyama desthilatdariya xwe de berdewam êriş biriye ser nêrînên cuda yên siyasî, olî, zayendî, zimanî û…hwd û jin jî kirine armanc.  Vê rejîmê ji bo berdewamiya desthilatdariya xwe gelek tawan encam dane û îro civaka me ji ber kuştina “Jîna Emînî” yê şînê digire.

	 

	Çend roj berê Jîna Emînî (22 salî) xelkê Seqizê li Tehranê ji aliyê hêzên tepeserker ên rejîma Îslamî ya Îranê ve bi hinceta hicabê hatibû girtin û kuştin. Ji bo vê jî gelê Rojhilatê Kurdistan û Îranê li piraniya bajar û bajarokan û bi taybet li Rojhilatê Kurdistanê xwepêşandanên xwe yên sivîl nîşan didin û rejîma çekdar êrîşî xwepêşanderan dikin, gelek kes hatine binçavkirin û civanekî kurd jî hatiye kuştin. 

	Di sînorên desthilatdariya vê rejîmê de jin bi awayên cuda tên çewisandin û her roj di bin metirsiya girtin, destavêtin û kuştinê de ne.

	Em hevxemiya xwe bi malbata Jîna Emînî û gelê azadîxwaz ên Kurdistanê re parve dikin, xwepêşandanên sivîl û kolanan ên xelkê rewa dibînin, rêzê li bersiva xelkê dijî zilm û zordariyê digrin û piştevaniya greva giştî ya roja duşemê 19.09.2022’ê dikin."