
Derbarê Emîne Şenyaşar de 15 lêpirsîn hatin vekirin 

2022-04-12 13:57:33


	&nbsp;

	RIHA - Emîne Şenyaşar a ku 400 roj e edaletê dixwaze derbarê wê de cara 15'an doz hat vekirin. Emîne ya ku çû li muduriyeta polîsan îfade da, piştre li ber edliyê di daxuyaniya ku da de got, "Ez bimirim jî ji vir ranabim."

	&nbsp;

	Xizm û parastvanên parlamenterê AKP’ê Îbrahîm Halîl Yildiz di 14’ê Hezîrana 2018’an de li Pirsûsê êrişî dikana malbata Şenyaşar kirIN. Di êrişê de hevjîn û du kurên Emîne Şenyaşar hatin qetilkirin û kurê wê Ferît Şenyaşar jî bi birîndarî xelas bû. Bi mebesta girtina kujeran û darizandina wan, Emîne û Ferît Şenyaşar di 9’ê Adara 2021’Ê de li pêşiya Edliyeya Rihayê dest bi Nobeta Edaletê kirin. Çalakiya malbatê îro di roja 400’Î de berdewam kir. Di roja 400’î ya çalakiyê de bi hinceta “heqaretê” derheqê Emîne Şenyaşar de lêpirsîn hate destpêkirin û bi vê sedemê ew bangî îfadeyê kirin. Emîne Şenyaşar li ser vê yekê tevî parêzerê xwe çû Midûriyeta Polîsan a Navçeyê û îfade da. Hat zanîn ku bi hinceta ku Emîneyê di çalakiya nobetê de “heqaret” li parlamenterê AKP’ê Îbrahîm Halîl Yildiz kiriye, derbarê wê de lêpirsîn hatiye destpêkirin. Piştî kar û barên îfadeyê jî Emîne vegeriya pêşiya Edliyeya Rihayê û li gel lawê xwe Ferît çalakiya xwe domand.&nbsp;

	&nbsp;

	Cara 15'an lêpirsîn hat vekirin&nbsp;

	&nbsp;

	Emîne Şenyaşar têkildarî lêpirsîna 15’emîn axivî û got: “Tiştekî bi navê edaletê nîne û ya ku li me tê kirin zilm e. Kurê min Fadil berd in. Ez bi vî halê xwe yê birojî nobetê digirim û daxwaza min edalet e. Erê baş e Emîne (hevjîna Erdogan) û Erdogan çawa dikarin razên? Ma dengê min qet naçe wan? Ma ez qet nakevim xewnên wan? Êdî bes e, Fadilê min berdin.”&nbsp;

	&nbsp;

	‘Ez bimirim jî ji vir ranabim’

	&nbsp;

	Bi domdarî Emîne anî ziman ku ev 400 roj in bi daxwaza edaletê dev ji mal û neviyên xwe berdaye û wiha domand: “Ma zarokên min çi kirine? Dikana wan bi xwe bû. Çima ew kuştin? Di îfadeyê de ji min dipirsin bê ka çima li vir rûdinim. Hem li Ferît û hem jî li min xistin. Em xistin nezaretxaneyê. Ez bizanim dê li vir bimrim jî heta kurê min neyê berdan ez &nbsp;ji vir ranabim.”&nbsp;

	&nbsp;

	'Kujerên 3 kesan bûne mexdûr'

	&nbsp;

	Ferît Şenyaşar destnîşan kir ku nobeta wan kete roja 400’î û wiha dirêjî da axaftina xwe: “Bi taybet bi boneya roja 400’î derheqê dayika min de lêpirsîn dan destpêkirin. Beriya hatina nobetê em çûn me îfade da. Piştre em vegeriyan vê derê. Di halê hazir de hiqûqa serdestan heye. Di rewşa heyî de kesên ku li nexweşxaneyê 3 kes qetil kirin bûne mexdûr. Lê dayika ku li edaletê digere weke bersûc gazî îfadeyê kirin. Em vê ji rayedaran re dibêjin. Lê hemû jî ji me re dibêjin; ‘tiştek ji destê me nayê. Ji me re çi ferman were em wê pêk tînin.’ Piştre jî ji me direvin.”&nbsp;

	&nbsp;

	'15 lêpirsîn hatin destpêkirin'

	&nbsp;

	Di nava 400 rojên "Nobeta Edaletê" de derheqê Emîne Şenyaşar de bi giştî 15 lêpirsîn hatin destpêkirin. Ji van 15 lêpirsînan 2 jê kirin yek û bi “şêweyê darizandina sivik” didomin. Her wiha îdianameya doza bi sedema heqaretê hatiye amadekirin jî ji hêla 4’emîn Dadgeha Cezayê Giştî ya Rihayê ve hate qebûlkirin. Dê di mehên pêşiyê de doz bê dîtin. Di çarçoveya doza heqaretê de ku 6’emîn Dadgeha Cezayên Giştî vekiribû, cezayê perayan ê 265 rojên edlî li Emîne Şenyaşar hate birîn.&nbsp;