Salvegera avakirina Kongreya Star hat pîrozkirin 

2022-01-13 17:03:44


	 

	NAVENDA NÛÇEYAN - Bi minasebeta 17'emîn avabûna Kongreya Star, şêniyên kantona Qamişloyê bernameyên pîrozbahiyê li dar xistin û bal kişandin ser domandina têkoşînê û rizgarkirina tevahî jinan.

	 

	Bi boneya salvegera 17'emîn a damezirandina Kongra Star ku dikeve 15'ê çileyê, şêniyên Qamişlo, endamên Kongra Star, endamên saziyên Rêveberiya Xweser salvegera 17'an a Kongra Star pîroz kir.

	 

	Li stada Qamişloyê civiyan 

	 

	Şahî li stada girtî ya li rojhilatê Qamişloyê hat lidarxistin. Endama rêveber a Kongra Star Menîhe Heyder axivî û salvegera Kongra Star li tevahiya jinan û Rêberê PKK'ê Abdullah Ocalan pîroz kir û got: “Bi saya fikr û felsefeya rêber Abdullah Ocalan me gelek destkeftî bi dest xistin. Destpêkê bi berxwedana gelek jinan, Yekitiya Star ava bû. Bê guman bingeha wê têkoşînê hebû. Em şehîd Sakîne Cansiz ji bîr nekin ku ji bo tevgera azadiya jinan bû mîras û dîrok. Pergala desthilatdar di hemû warên siyasî, civakî û çandî de jinan dike hedef. Me fikrên Rêber Abdullah Ocalan ji xwe re kirine bingeh, em hêza xwe ji şehîdên xwe digirin.”

	 

	Li Tirbespiyê pîrozbahî

	 

	Li navçeya Tirbespiyê şêniyan şahiyek organîze kir. Hemû pêkhateyên navçeyê tev lê bûn. Şahî li Hola Siyasî ya li bakurê navçeyê li dar ket. Tê de endama rêveber a Kongra Star a kantona Qamişloyê Henîfe Xelîl axivî û got: “Ji ber zilma li ser jinan tê meşandin û li gel siyasetên zordest diviyabû tevgereke jinan hatiba avakirin ku mafên wê biparêze û ji bo azadiya wan tê bikoşe.”

	 

	Endama Meclisa Malbatên Şehîdan a navçeya Tirbespiyê Îman Seîd jî di şahiyê de axivî û destnîşan kir ku jin ji zîhniyet û siyasetên dijber rizgar bûn û di gelek warên leşkerî, siyasî û civakî de bûn pêşeng.

	 

	Til Birakê şahiya jinan 

	 

	Li Til Birakê bi heman armancê, Kongra Star şahiyek li hola Navenda Çand û Hunerê ya navçeyê li dar xist. Bi dehan şêniyên navçeyê beşdarî şahiyê bûn.

	Hevseroka Meclisa Navçeya Til Birakê Emîne Xilêf axivî û salvegera damezirandina Kongra Star pîroz kir û piştrast kir ku heta rizgarkirina hemû jinan ji zîhniyeta baviksalar, berxwedan û têkoşîna wan berdewam e. Her wiha di şahiyê de endama rêveber a Kongra Star Henen Silêman axivî û got: “Kongra Star hewl da jinan bi rêxistin bike û wan perwerde bike, piştî ku gelek azar ji ber zîhniyeta baviksalar û kevneşopan kişandin.”

	 

	Şahî bi gerandina govendê bi dawî bû.