Konseya Ewropayê bersiv da nameya derbarê tecrîdê de  

2021-11-08 13:57:41


	 

	 

	NAVENA NÛÇEYAN - Konseya Ewropayê, bersiv da nameya ku Sendîkaya Solidairesê derbarê tecrîdê de jê re nivîsandibû. Konseya Ewropayê wiha got : "Sekreterê Giştî yê Parlamentoya Ewropayê bi tu awayî nikare mudaxaleyî dadgeheke serbixwe bike." 

	 

	Sendîkaya Solidairesê ku li Fransayê xebatan dike, bi daxwaza ku tecrîda li ser Rêberê PKK'ê Abdullah Ocalan bi dawî bibe di 6'ê cotmehê de ji Sekretara Giştî ya Parlamentoya Ewropayê (PE) Marîa Pejcînovîc-Bûrîç re name nivîsand. Mîroslav Papa ku Midûrê Kabîneya Alîkariya Sekreteriya Giştî ya PE'yê ye li ser navê Marîa Pejcînovîc-Bûrîçê bersiv da nameyê û ev tişt got: “Wekî ku hûn jî dizanin derbarê şertên girtîbûnê di navbera CPT û rayedarên tirk de diyalogeke bi pergal û veşartî heye. Rapora CPT’ê ya ku derbarê serdana di sala 2021’ê de kiribû û bersiva rayedaran, li gorî pêkanînên peymannameya Ewropayê ya derbarê îşkence, ceza û miameleya li hemberî mirovatiyê wê ji raya giştî re were eşkerekirin.”

	 

	Mîroslav ev jî lê zêde kir û got: “Wekî ku we jî diyar kiriye rêzdar Ocalan û pênc girtiyên din ên li Girtîgeha Îmraliyê di Cotmeha 2011’an de derbarê astengiyên hevdîtinên bi malbat û parêzerên xwe serî li Dadgeha Mafên Mirovan a Ewropayê dabûn. Rêzdar Ocalan di Îlona 2018’an de bi heman sedeman dîsa serlêdanek kiribû. Ev daxwaz di Îlona 2019’an de ji hikumeta tirk re hatiye ragihandin û dadgeh li gorî proseduran li ser wê disekine. Sekretera Giştî ya Konseya Ewropayê bi tu awayî nikare mudaxeleyî dadgeha serbixwe bike.”

	 

	Mîroslav, diyar kir ku heke rewşên li dijberî Peymannameya Mafên Mirovan a Ewropayê were tespîtkirin wê li gorî xala 46’an a peymannameyê, rewş di bin kontrola Komîteya Wezîran a Konseya Ewropayê de be. Di bersivê de îddîaya “Konseya Ewropayê, sazî û dezgehên wê, li gorî peywirên xwe, wekî ji bo Tirkiye û hemû welatên xwe yên endam, gelekî qîmetê dide tevgerên li gorî standardên di warê mafên mirovan, demokrasî û hiqûqê de” cih girt.

	 

	'Divê girtiyên siyasî serbest bên berdan'

	 

	Sendîkaya Solîdaîresê, diyar kiribû 10 sal derbas bûye ku parêzerên Rêberê Gelê Kurd Abdullah Ocalan ji bo rakirina tecrîdê serî li Dadgeha Mafên Mirovan a Ewropayê daye û xwestibû bila sedema vê derengmayinê were eşkerekirin. Solîdaîresê gotibû: “Serbestbûna Abdullah Ocalan ji bo çareseriya siyasî ya ji bo gelê kurd ê li Tirkiye û Rojhilata Navîn, şertek e. DMME, Konseya Ewropayê û NY ji ber ku Tirkiye mafên girtiyan ên li gorî hiqûqa navneteweyî binpê dike, divê li ser Tirkiyeyê zext were kirin.”

	 

	Solîdaîresê bang li Konseya Ewropayê kiribû û gotibû bila piştgiriyê bidin daxwaza gelê kurd ku ‘Divê Abdullah Ocalan û hemû girtiyên siyasî serbest werin berdan.”