Li Rojava vekirina Buroya Pirjiniyê hat şermezarkirin 

2021-10-21 15:52:47


	 

	 

	NAVENDA NÛÇEYAN - Kordînasyona Kongreya Star a Rojava vekirina Buroya Komeleya Pirjiniyê şermezar kir û got: "Em li mêr û civakê dikin ku dev ji zihniyeta pirjiniyê berdin û beşdarî avakirina civakeke exlaqî bibin. Divê hemû rêxistinên jinan li dijî pirjiniyê yekîtiya xwe ava bikin."

	 

	Kordînasyona Kongreya Star a Rojava îro daxuyaniyeke nivîskî weşand û vekirina Buroya Komeleya Pirjiniyê ya li herêma Ezazê ya dagirkirî, şermezar kir.

	 

	Di destpêka daxuyaniyê de wiha hat gotin: "Em wek Kordînasyona Kongreya Star a Rojava tiştên ku li wan herêman diqewimin ên ji ber zîhniyeta baviksalarî û paşverû ya ku bandoreke neyinî li civakê û bi taybet li jinan dike, bi tundî şermezar dikin."

	 

	Di daxuyaniyê de hat bibîrxistin ku mafê zewaca gelek jinan re bû sedema koletiya jinan û wekî makîneyekê tenê ji bo zarokanînê û sînordarkirina rola wan bi xizmetkirina mêran û karê malê de ye û wiha hat diyarkirin: "Jin li wan herêman rastî gelek pirsgirêkên siyasî, civakî, aborî, çandî û psîkolojîk tên."

	 

	Di daxuyaniyê de hate piştrastkirin ku piştgiriya pirjiniyê ji bo hemû jinan metirsiyekê çêdike û wiha hate gotin: “Divê em li dijî van pirsgirêkên ku zirarê didin civakê rawestin da ku wekheviya jin û mêr di kar de pêk were. Bi şoreşa Rojava re jinê mafên xwe nas kir û hebûna xwe îspat kir û di hemû qadan de cihê xwe girt, lê tevî vê yekê jî gelek jin rastî neheqiya civakê tên û civak hîn zihniyeta desthilatdar li ser wan dimeşîne."

	 

	Daxuyanî wiha dom kir: "Kongreya Star bi xebat û çalakiyên xwe karibû pirjiniyê bi rêya qanûnên civakî û perwerdekirina civakê sînordar bike, da ku rê li ber paşverûtiyê bigire. Bi qanûnên xwe Kongreya Star hewl dide civakê perwerde bike û ji bo çareserkirina pirsgirêkên civakî çalakiyên xwe yên di nava civakê de zêde bike."

	 

	Di daxuyaniyê de bang li mêr û civakê hat kirin ku dev ji zihniyeta pirjiniyê berdin û beşdarî avakirina civakeke exlaqî bibin. Kongreya Star bang li hemû rêxistinên jinan kir ku li dijî pirjiniyê yekîtiya xwe ava bikin û bi hemû jinan re têkiliyê deynin da ku rêxistinê xurt bikin û qanûna jinan di civakê de pêk bînin.