Emîne Şenyaşar: Dê rojek ev zilmkar cezayên xwe bikişînin  

2021-08-18 14:36:18


	 

	 

	RIHA - Malbata Şenyaşar 163 roj in çalakiya xwe ya "Nobeta Edaletê" didomînin. Emîne Şenyaşar di çalakiyê de got: "Em ji bo edaletê têdikoşin û wê rojek ev îqtidar jî biçe û wê zilmkar hemû cezayên xwe bikişînin."

	 

	Malbata Şenyaşar di roja 163’yemîn de li ber Edliyeya Rihayê “Nobeta Edaletê” berdewam kir. Malbatê îro bi Fadil Şenyaşar ê sê sal in girtî ye re hevdîtina telefonê pêk anî. 

	  

	Ferît Şenşayar ku li gel dayika xwe Emîne 163 roj in ji bo edaletê têdikoşe axivî û wiha got: “Têkoşîna me ya edaletê 163 roj in di bin zilmê de berdewam dike. Sê mirovên me li nexweşxaneyê hatin qetilkirin. Sê sal in têkildarî dozê tu geşedanek nîne. Kesek jî nehatiye binçavkirin. Kujer li Pirsûsê serbest digerin. Polîs û serdozger jî wezîfeya xwe nakin û şirîkê sûc in. Tevahiya dinyayê li vê zilmê temaşe dike. Kujer hemû diyar in. Birayê min Fadil Şenyaşar sê sal in di hucreya yek kesî de tê girtin. Tevahiya Rihayê, Tirkiyê û dinyayê li zilmê temaşe dike. Dewletek ku bêedalet be ew dewlet nîne. Êdî wê hêza ku em ê vê zilmê ragirtin nemaye. Bila dadger û dozger wezîfeya xwe bikin û hiqûqa serdestan bi dawî bibe.”

	  

	Emîne Şenyaşar jî destnîşan kir ku ew ji bo edaletê têdikoşin û wê rojek ev îqtidar jî biçe û wê zilmkar hemû cezayên xwe bikişînin. 

	 

	Malbatê li ser hesabê xwe yê medya sanal jî peyam belav kir û xwest mirovahî li hember vê drama mirovahiyê bêdeng nemîne.