Rapora ÎHD'ê ya Êlihê: Lêgerîna tazî li girtiyan tê ferzkirin  

2021-06-24 15:49:41


	 

	 

	ÊLIH - Derbarê girtîgehên li Êlihê de Şaxa ÎHD'ê raporek amade kir. Di raporê de hat diyar kirin ku girtî dema sewqkirinê de lêgerîna tazî li girtiyan tê ferzkirin, îşkence û muameleya xerab li wan tê kirin. 

	 

	Şaxa Komeleya Mafê Mirovan (ÎHD) a Êlihê, rapora xwe ya ku derbarê binpêkirinên mafan ên li girtîgehên Êlihê amade kiribû, bi civîneke çapameniyê li avahiya xwe aşkera kir. Endamê Komîsyona Girtîgehan a Şaxa ÎHD'ê Parêzer Yûnûs Bagiş, rapora ku hatibû amadekirin xwend.

	 

	Di raporê de wiha hat gotin: "Di hêla mafê ragihandin, agahî girtin, têkilî danîn û tednuristiyê de pirsgirêk li girtîgehan hene. Her wiha girtiyan lêgerîna tazî, îşkence û muameleya xerab anîn ziman. Girtiyan got ku di warê werzîj, çand û hunerê de nikarin tiştekî bikin." 

	 

	Di raporê de çend daxwaz û pêşniyarên ku hatin kirin jî wiha ne:

	 

	“* Divê rêveberiya girtîgehê bi pirsgirêkên tenduristiyê yên girtiyan re mijûl bibe, girtiyan di wextê de bibe nexweşxaneyê û şertên revîrê baş bike. 

	 

	* Divê astengiyên li pêşiya mafê werzîj, çand û hewadarî bên rakirin. 

	 

	* Divê astengkirinên li ser pirtûk, kovar û rojnameyan bên rakirin. 

	 

	* Divê îdiayên îşkence û muameleya xerab bi awayekî bi bandor bên lêpirsînkirin, derbarê eleqedaran de lêpirsîn bê destpêkirin û eleqedar ji peywirê bên dûrxistin.

	 

	* Divê pêkanînên dayîna tekmîlê, hucreya yekkesî û jimartina li ser piya bi dawî bibin."