
Emîne Şenyaşar: Malbata min qetil kirin û li çepikan dan 

2021-06-14 13:28:33


	&nbsp;

	&nbsp;

	RIHA - Emîne Şenyaşar a li ber Edliyeya Rihayê bi daxwaza "edaletê" çalakiya rûniştinê li dar dixe wiha got:"Malbata min li nexweşxaneyê qetil kirin û li çepikan dan. Komkujiya hatiye kirin tê veşartin."

	&nbsp;

	Li navçeya Pirsûsê ya Rihayê beriya Hilbijartina Giştî ya di 24’ê Hezîrana 2018’an de di 14’ê Hezîranê de xizm û alîgirên Parlamenterê AKP’ê yê Rihayê Îbrahîm Halîl Yildiz li kargeha Malbata Şenyaşar û heta ber Nexweşxaneya Dewletê ya Pirsûsê êrişî ferdên malbatê kir û ji heman malbatê Hacî Esvet Şenyaşar û du lawên wî Celal û Adil qetil kirin. Di bûyerê de birayê Îbrahîm Halîl Yildiz ê AKP’yî jî hat kuştin. Fadil Şenyaşar jî birîndar bûbû û ev sê sal in girtî ye. 3 sal ji ser êrişa li dijî Malbata Şenyaşar derbas bû lê hêj kujer nehatine darizandin. Emîne Şenyaşar û lawê xwe Ferît ji bo edalet pêk were 98 roj in li ber Edliyeya Rihayê nobetê digirin.&nbsp;

	&nbsp;

	Malbat di salvegera komkujiyê de îro jî serê sibehê hatin ber edliyeyê û çalakiya xwe domand.&nbsp;

	&nbsp;

	‘Malbata min li nexweşxaneyê qetil kirin û li çepikan dan’&nbsp;

	&nbsp;

	Emîne Şenyaşar anî ziman ku 3 meh in ew li ber edliyeyê li edaletê digerin û wiha got: “Li ber edliyeyê bera me dan, li me dan, me xistin nezaretxaneyan, me derxistin dadgehan. Lê yên ku komkujî pêk anîne serbest digerin. Kurê min Fadil 3 sal in bi tena serê xwe di hefsê de ye. Em çûn ku derê jî lê me edalet nedît. Çima qeydên nexweşxaneyê dernaxin û komkujiyê vedişêrin? Malbata min li ber nexweşxaneyê qetil kirin û li çepikan dan. Bila kujer werin girtin. Ev 3 sal &nbsp;in min çi kir jî lê min edalet nedît. Ez heta Enqereyê çûm jî lê edalet nîne. Dozger çima vê komkujiyê vedişêrin? Çima vê yekê li me dikin? Malbata min qedandin.”&nbsp;

	&nbsp;

	‘Em dixwazin her kes piştevaniya vê qîrîna edaletê bike’&nbsp;

	&nbsp;

	Ferît Şenyaşar jî bi bîr xist ku îro salvegera komkujiya li dijî malbata wî pêk hatiye ye û wiha got: “Parlamenterek û eqrebayên xwe li ber nexweşxaneyê 3 ferdên malbata me qetil kirin. Ji ser vê komkujiyê 3 sal derbas bûn. Dosya li ber destên serdozger e û hêj doz venekiriye. Têkildarî êrişê kes negirtine. Ev sê meh in em edaletê dixwazin. Niha Serdozgerê Komarê yê Rihayê kujeran diparêze û sûc dike. Dibe şirîkê sûc û wezîfeya xwe nebaş bi kar tîne. Heke rojek edalet pêk were wê ev dozger û dadger jî werin darizandin. Em ê giliyê wan bikin. Em ê dest ji doza xwe ya mafdar bernedin. Em îro neçûn goristanê. Çimkî tenduristiya diya min nebaş e û êdî nikare tiştên hatine serê wê ragire. Ev 3 meh in dayikek li ser peyarêyê li edaletê digere. Em dixwazin her kes piştevaniya vê qîrîna edaletê bike.”&nbsp;

	&nbsp;

	Nobeta malbatê ya li ber edliyeyê berdewam dike.&nbsp;

	&nbsp;

	&nbsp;