Xizmên windayan li aqûbeta Kuddusî Adiguzel pirsîn  

2021-04-03 12:54:16


	 

	 

	AMED - Xizmên windayan, aqûbeta Kuddusî Adiguzel ê li gundê Kanika ya girêdayî navçeya Pasûrê, di Adara 1994’an de, eskeran di serdegirtina malê de bi îşkenceyê binçavkirin û dûre carek din agahî jê nehat girtin, pirsîn. 

	 

	Şaxa Komeleya Mafê Mirovan (ÎHD) ya Amedê û xizmên windayan, bi armanca “Winda bên dîtin û faîl bên darizandin” çalakiya xwe ya heftiya 634’emîn, li ser hesabê xwe yê medya civakî bi weşandina vîdeoyekê li dar xist. Di çalakiya vê heftê de, çîroka Kuddusî Adiguzel ê li gundê Kanika ya girêdayî navçeya Pasûrê ya Amedê, di adara 1994’an de eskeran di serdegirtina malê de bi îşkenceyê binçav kirin û pişt re bi tu awayî agahî jê nehat girtin hat vegotin. Endama Desteya Rêveber a Şaxa ÎHD’ê ya Amedê Gurbet Yavûz çîroka Kuddusî Adiguzel xwende. Parêzer Mesût Beştaş û pêvajoya hiqûqî yê Kuddisî vegot.

	 

	Gurbet, diyar kir  ku leşkeran di 18’ê adara 1994’an de bi ser mala Kuddusî Adiguzel de digirin û wiha axivî: “Leşker piştî lêgerîna di malê de, naylonê bi ser canê Adiguzel de dehilînin. Leşker vê îşkenceyê li ber çavên hevjîn û zarokên wî li wî dikin. Cerdevanê li navenda Pasûrê dijî Mûhsîn Can jî di serdegirtina malê de cih digire. Leşker û cerdevan dûre mala Kuddisî Adiguzel didin ber agir û wî bi xwe re dibin. Ewil wî dibin Qereqol Sivrîce û ji wir jî dibin Qereqola Leşkerî ya Navçeya Pasûrê. Malbata Kuddusî diçe Qereqola Leşkerî ya Pasûrê û bi Serpêl Abdullah re hevdîtinê dike. Ligel hemû serlêdanan jî malbat tu encamê bi dest naxwe. Di 12’yê Hezîrana 1994’an de li goma Duzpelît a gundê Hacana ya Pirsûsê 8 cenaze tên dîtin. Li ser vê yekê hevjîna Kuddûsî Muhlîse Adiguzel diçe cihê bûyerê. Hevjînê xwe ji kincên wî nas dike. Lê ji ber ku ditirse, vê yekê bi kesekê re parve nake û serî li tu saziyên fermî nade.”

	  

	Parêzerê malbatê Mesût Beştaş ê pêvajoya hiqûqî ya bûyerê dişopand jî, wiha axivî: “Di sala 2001’an de dosye ji bo me hat. Piştî ku çend daxwaznameyên me ji bo hiqûqa hûndirin rêkirin, me serî li Dadgeha Mafê Mirovan a Ewropayê (DMME) da. Lê serlêdana me nehat qebûl kirin.”