
ÎHD'ê derbarê darizandina Dayikên Şemiyê de daxuyanî da

2021-03-24 15:58:46


	&nbsp;

	AMED - Şaxa ÎHD'ê ya Amedê derbarê darizandina 46 Dayikên Şemiyê de daxuyanî da. Di daxuyaniyê de hat diyarkirin ku ew li ber têkoşîna dayikan bi rêzdarî bejna &nbsp;xwe ditewînin.&nbsp;

	&nbsp;

	Dayikên Şemiyê di 25’ê tebaxa 2018’an de xwestibûn li Qda Galatasarayê çalakiya xwe ya 700’î li dar bixin. Polîsan xwe li çalakiya dayikan negirt, êrişî wan kirin û gelek ji wan binçav kiribûn û paşê berdabûn. Derbarê Dayikên Şemiyê de bi îdiaya “Li dijî qanûna civîn û meş xwepêşandanan ya jimara 2911’an derketine” doz hatiye vekirin. 46 dayik ji vê dozê tên darizandin û wê danişîna dozê sibê li Edliya Stenbolê were kirin. Komeleya Mafê Mirovan (ÎHD) a Şaxa Amedê têkildarî darizandina Dayikên Şemiyê li avahiya xwe civîna çapemeniyê li dar xist.&nbsp;

	&nbsp;

	Serokê Komeleyê Abdullah Zyetûn di civînê de axivî û destnîşan kir ku ew li cem têkoşina edaletê ya Dayikên Şemiyê cih digirin û got: “Qada Galatasarayê û Abîdeya Mafên Mirovan a Koşûyolû yên me hemûyan e û em ê li wan qadan têkoşîna xwe ya maf û edaletê berdewam bikin.”&nbsp;

	&nbsp;

	'Di bin çavan de kes winda kirin'

	&nbsp;

	Piştre Rêvebera Komeleyê parêzer Gurbet Yavuz daxuyanî xwend û bi bîr xist ku di salên 90’î de ji ber êrişên hêzên dewletê û hêzên paramîlîter ên li ser navê dewletê tevger dikirin bi hezaran kes di binçavan de hatin windakirin. Gurbetê anî ziman ku Dayikên Şemiyê û Xizmên Windayan tevî hemû zextan jî çalakiyên xwe didomînin û li gel van pêkûtiyan jî dest ji têkoşîna xwe ya edaletê bernedan. Gurbetê got çalakî û civînên Dayikên Şemiyê û Xizmên Windayan ne li dijî qanûnan e û xwest dayik ji dozê werin beraetkirin. Gurbetê diyar kir ku ew jî li gel dayikan wê têkoşîna xwe ya edaletê berdewam bikin û li hember têkoşîna wan bejna xwe ditewînin."&nbsp;