
'Sîstemên serwer dixwazin jiyana jinê bê wate bikin' 

2020-09-22 09:01:02


	&nbsp;

	Hesna Mihemed

	&nbsp;

	ŞEHBA - Endama Komîteya Jinê ya Meclîsa Kantona Efrînê Sureya Mistefa têkildarî êrîş û qirkirina li ser jinê anî ziman ku sîstemên serwer dixwazin jiyana jinê bê wate bikin û wiha got:"Zext û zihniyeta serwer di civakê de dihêle ku jin bi bûyerên qetilkirinê re rû bi rû bimîne. Lê qetilkirina jinan sûc e û pêwist e sûcdar bên cezakirin."

	&nbsp;

	Ji ber zihniyetea paşverû û baviksalarî ya civak di bin bandorê de dimîn êrîş û qetilkirina li ser jinan her ku diçe zêde dibe. Tevî ku gelek guhertin û veguhertinên bingehîn di civakê de hatine avakirin, lê heya niha dîsa jî jin tên qetilkirin. Têkildarî mijarê Endama Komîteya Jinê ya Meclîsa Kantona Efrînê Sûreya Mistefa, sedema qetilkirin û xwekuştina jinan nirxand û bi me re parve kir.&nbsp;

	&nbsp;

	‘Sîstemên desthilatdar di mêjiyê civakê de koletî daye rûniştandin’&nbsp;

	&nbsp;

	Di destpêka nirxandina xwe de Sureyayê bal kişand pêşengiya jinê ya di nava qadên civakê de û wiha got: "Jin di hemû qadên jiyanê de xwedî pêşengtiyeke ber bi çav bûn. Ev yek ji bo gelek sîstemên ku dixwazin vîna jinan biçewisînin bû sedema nerazîbûnê . Daxwaza wan ew e ku civakê di şexsê jinê de hedef bigirin û jiyaneke bê wate bidin jinê. Tevî hemû astengiyan jinan têkoşîna xwe domandin. Di şoreşa Rojavayê Kurdistanê de ev yek baş hat dîtin. Sîstemên desthilatdar di mêjiyê civakê de koletî &nbsp;daye rûniştandin, lewra her hovîtiya xwe bi ser jinan de tînin."

	&nbsp;

	'Desthilatdar hebûna jinan qebûl nakin'

	&nbsp;

	Sureyayê sedemên ku dihêle jin bigihêje asta xwekuştinê anî ziman û wiha domand: "Di bin navê urf û şermê de jin di civakê de hatiye çewisandin û mafê wê yê jiyanê hatiye desteserkirin. Desthilatdar hebûna jinan qebûl nakin. Zext û zîhniyeta serwer di civakê de dihêle ku jin bi bûyerên qetîlkirinê û xwekuştinê re rû bi rû bimîne. Qetilkirina jinan sûc e û pêwist e sûcdar bên cezakirin."

	&nbsp;

	'Pêwistî bi zanekirina civakê û perwerdekirina wê heye'

	&nbsp;

	Di dawiyê de Sureyayê bang li rêxistin û komeleyên jinan kir ku xwedî li jinan derbikevin û wiha gotina xwe bi dawî kir: "Ger em bixwazin mijara qetilkirina jinan ji holê rabikin pêwistî bi zanekirina civakê û perwerdekirina wê heye. Pêwist e li aliyê din jî jin hemû li kêleka hev li dijî vê yekê têbikoşin."&nbsp;

	&nbsp;