‘Dewleta tirk dixwaze bi rêya êrîşan yekîtiya kurdan têk bibe’  

2020-06-22 15:58:53


	 

	Ferîde Zade

	 

	ŞEHBA - Jinên Efrînê û malbatên şehîdan ên ku tevlî meşa li dijî êrîşên dewleta tirk bûne, derbarê êrîşan de helwestên xwe nîşan dan û gotin: “ Dewleta tirk bi armanca tunekirina Gelê kurd êrîş dike û di pêvajoya yekîtiya kurdan de dixwaze bi rêya êrîşan vê yekîtiyê têk bibe.” 

	 

	Bi pêşengtiya Meclîsa Malbatên Şehîdan a Efrîn û Şehabyê meşeke girseyî  li dijî êrîşên dewleta tirk ên li ser Herêmên Başûrê Kurdistanê hat lidarxistin. Jinên ku tevlî meşê bûne li hember van kiryaran bertekên xwe nîşan dan û nêrîna xwe bi me re parve kirin. 

	 

	‘Em ê xewin û xeyalên dewleta tirk têk bibin’

	 

	Jina bi navê Sewsen Ehmed a ku beşdarî meşê bûye hestên xwe li hember êrîşên dewleta tirk anî ziman û ev tişt got: “Em tevlî meşa li dijî êrîş û dagirkeriyê bûne ji bo ku em  kiyarên dewleta tirk a dagirker şermezar bikin. Armanca tirkiyeyê parçekirina kurda ye, lê em ê xewin û xeyalên dewleta tirk têk bibin. Erdogan li seranserî Kurdistanê şer dike, weke jinên  kurd em ê her li pêşiya zîhniyeta  dewleta tirk û komên çeteyên girêdayî wî bisekinin.  Em nahêlin ev zîhniyeta faşîzim di nava civakê de belav bibe.”

	 

	‘Em ê dengê berxwedanê bilind bikin’

	 

	Hevjîna pakrewanê bi navê Ebdo, Sibhan Hisên li ser kiryarên ku li dijî mirovan tên kirin nêrîna xwe bi me re parve kir û wiha got: “Em weke Meclîsa Malbatên Şehîdan bi destekdayina gelê xwe dengê berxwedanê bilind dikin. Em ê her di nava têkoşînê de bin  heta ku em bigihêjin armancên xwe û azadiya tevahî gelan mayinde bikin. Armanca êrîşan hedefgirtina fikirê azadiyê ye.”

	 

	‘Divê hemû mirovên kurd li dijî dagirkeran rabin ser piyan’

	 

	Dayika pakrewan Zinar û Têkoşîn, Sebah Reşîd êrîşên dewleta tirk şermezar kir û wiha pê de çû: “Em ê her li ser piya bin û êrîşên dagirkeriya dewleta tirk şermezar bikin. Em ji navçeya Şêrewa ne rojane dewleta tirk êrîşî me dike û di nava dorpêçê de me dihêlin. Divê hemû mirovên kurd li dijî dagirkeriyê rabin ser piyan.”

	 

	‘Ji bêdengiya mirovan re êdî bes e’

	 

	Endama Kongreya Star a navçeya Şêrewa li Efrînê, Leyle Xelîl teqes kir ku divê her kurdek li dijî êrîşên dewleta tirk dakeve kolanan û got: “Banga me ji hemû mirovên kurd  re heye ku bi erkê xwe rabin, li hember êrîşan dakevin kolanan û yekîtiya xwe xurt bikin. Di pêvajoya  avakirina yekîtiya kurdan de dewleta tirk êrîş dike, ji ber armanca wî têkbirina vê yekîtiyê ye. Ji bêdengiya mirovan re êdî bes e.”