Li Til Temîrê Noel hat pîroz kirin 

2019-12-25 13:40:44


	 

	Sorgul Şêxo

	 

	HESEKÊ - Aşûrî û ermeniyên ku rojbûna Pêxember Yesû El-Mesîh pîroz kirin hêvî û daxwazên xwe anîn ziman û gotin: "Daxwaza me jî ji gelê me yên ku derketine derveyî welat dîsa vegerin ser axa xwe."

	 

	Îro, serê sibehê li ser dengê zingilên Dêra Meryem El-Ezra a ku li navçeya Til Temirê dikevê, gelê aşûrî, ermenî û suryanî berê xwe dan dêrê û rojbûna pêxemberê xwe pîroz kirin. Jinên Aşûrî û Ermenî yên ku cejin pîroz kirin nêrînên xwe anîn ziman.

	 

	'Rojeke nû ye' 

	 

	Welîda Davîd ku bi eslê xwe Ermen e cejin wiha pênase kir: "Ev rojbûna pêxember ji bo gelê me û tevahî cîhanê rojeke nû ye, di vê rojê de tîrêjên aştiyê li tevahî cîhanê belav dibe. Em di vê cejinê de kêfxweşî û aştiyê ji tevahî cîhanê re hêvî dikin."

	 

	'Daxwaza me dewleta tirk ji Sûriyê derkeve'

	 

	Welîdayê bal kişand ser êrîşên dewleta tirk û ev tişt hêvî kir: "Em hêvî û daxwaz dikin ku dewleta tirk ji xaka me derkevê û vegerê paş sînorê xwe  û dîsa aramiyê Sûriyeyê vegere wekî berê."

	 

	'Bila vegerin ser axa xwe'

	 

	Hîlda Sîmon a Aşûrî jî wiha got: "Tevî ku hejmara aşûrî, ermenî û suryaniyên navçeya Til Temir ne wekî berê ne jî, lê em parastina çand û dîroka xwe dikin û daxwaza me jî ji gelê me yên ku derketine derveyî welat dîsa vegerin ser axa xwe."