Komcivîna Jîneolojiyê bi nirxandin û nîqaşan berdewam dike 

2019-09-25 16:23:34


	 

	Dilûcan Bozî

	 

	KOBANÊ - Bi dirûşma "Ji bo li dijî derketina zayendparêziya civakî, em dibêjin Jîneolojî" Komcivîna Jîneolojiyê li Kantona Kobanê dest pê kir û bi beşa zayendparêziya civakî û zewaca zarokan hat şîrovekirin.

	 

	Navenda Lêkolînên Jîneolojiyê ya Kantona Kobanê yekem car li Kantona Kobanê mijarên zayendparêziya civakî, tundiya li ser jinan, zewaca zarokan û ji bo rê û rêbazên çareseriyê em dibêjin Jineolojî komcivînek li dar xist. Di komcivînê de nêzî 100 kes ji partiyên siyasî, Tevgera Ciwanên Şoreşger ê Sûriyeyê, Endamên Sazî û dezgehên Rêveberiya Xweser a Demokratîk û kesên serbixwe beşdarî komcivînê bûn. Komcivîn li li Eywana Furat a Kobanê tê lidarxistin.

	 

	Komcivîn niha bi beşên zayendparêziya civakî û zewaca zarokan tê nirxandin û niqaşkirin. Beşa zayendpareziya civakî ji aliyê Endama Koordînasyona Kongreya Star a herêma Firatê Mîzgîn Xelîl, beşa zewaca zarokan jî ji aliyê Rêveberiya Jinên Ciwan ya Bakur û Rojhilatê Sûriyê Jiyan Koçer ve tên xwendin. Piştî xwendinê nêrînên beşdarvanan hatin girtin. 

	 

	'Divê ji pirsgirêkên jinan re çareserî were dîtin'

	 

	Endama Rêveberiya Xweser a Demokratîk a Kantona Girê Sipî  Peyman Aydin nêrîna xwe di nava komcivînê de anî ziman û wiha got: "Zayendperstî derbeya  herî mezin li vîna jinan xistiye.  Ji xwe derbeya destpêkê jî li çanda jinên civaka xwezeyî bû,  dema ku jin ji mafê xwe yê  pêşengtiyê hat dûrxistin û bi zîhniyeta desthilatdariyê re rû bi rû ma. Ger em îro qala jin wekî zayend bikin, em dikarin bêjin tenê jin wekî amûrê firotinê dihat bikaranîn û ji bo civakê zarokan çêbike lê dihat mêze kirin. Ev hemû xalên girîng in divê li ser wan were sekinandin û çareseriyeke mayinde jê re were dîtin."

	    

	'Jin avakerên civakê ne û afrînerên aramiyê ne' 

	 

	Endama komîteya Têkiliyên Partiya Yekitiya Demokratîk (PYD) Ayşe Efendî qala mijara  xebatê jin di nava  civakê de dike û wiha dibêjê: "Kar û xebatên di Bakur û Rojhilatê Sûriyê de tê meşandin tevahî  jin pê radibin . Zîhniyet û dijminatiya  li ser jinan hatiye ferzkirin, me jinan parçe kiriye. Jin îro avakerên civakê ne û ji bo ked û vîna xwe têkoşînê didin. Em dikarin bêjin encex jin aramiya civakan bi xwe re bînê û ji hovîtiya civakê re bibe bersiv."

	 

	'Di civakê de zîhniyet pêş neketiye û divê were guhertin'

	 

	Rêveberiya Mala Jin ya Kobanê Siltanê Hemdî di derbarê  mijara zewaca zarokan de ya ku di hundirê komcivînê de hatiye nîqaşkirin wiha nêrîna xwe anî ziman: "Zewaca zarokan ji ber sedemên şer, koçberî, tecawizkirin zêde bûye.Helbet ev ne hêncetên bingehîn in ku zarok bên zewicandin. Di civakê de zîhniyet pêş neketiye û divê bi rêbazên demokratîk bên guhertin. Divê mejiyê mirovan bi tiştên baş bifikire, da ku azadiya tevahî jinan mayinde bibe."

	 

	Komcivîn bi nîqaşan didome.