Doza 5'ê Hezîranê: Ev sê sal in hûn dengê me nabihîsin

2019-09-20 14:51:56


	 

	ENQERE - Danişîna doza komkujiya 5'ê Hezîranê ya li Îstasyona Amedê hat dîtin. Parêzeran xwest Serokwezîrê berê û Serokê AKP'ê Ahmet Davutoglu jî bê guhdarkirin. Lê heyeta dadgehê bi hinceta "Fêda guhdarkirina Dovutoglu li dosyayê nabe" daxwaza parêzeran red kir. Heyetê xwest Hevjîna Îlhamî Balî yê DAIŞ'î Hulya Bali ku dema hatibû girtin jî li dosyayê bê zêdekirin. 

	 

	Di 5'ê Hezîrana 2015'an de Rêxistina HDP'ê ya Amedê li Qada Îstasyonê ya Amedê bi tevlêbûna sed hezaran mîtîng li dar xistibû. Endamên DAIŞ'ê li qada mîtîngê teqemenî bi cih kiribûn û di nava girsê de teqandibûn. Di êrîşa DAIŞ'ê de 5 kesan jiyana xwe ji dest dabû. Bi sedan kes jî birîndar bûbûn. Piştî bûyerê der barê 5 bersûcan de doz hat vekirin. Danişîna dozê li 2’emîn Dadgeha Cezayên Giran a Sîncanê hat dîtin. Di danişînê de parlamenterê HDP'ê Kemal Pekoz û mexdûra bûyerê Lisa Çalan û parêzerên mexdûran amade bûn. Bersûcên girtî Mustafa Kilinç, Îsmail Korkmaz, Orhan Gonder û Burhan Gok ji girtîgehên lê girtî bi rêya (SEGBİS) beşdarî danişînê bûn. Heyetê ewil biryara ku 2 dosyayên Lisa Çalan ên di teqînê de 2 piyên xwe winda kirine bibin yek. Di danişînê de bersûc Orhan Gonder û Mustafa Kılınç, gotinên xwe yên berê dubare kirin û xwestin bên berdan." 

	 

	Parêzeren bersûcan xwest Serokwezîrê wê demê Ahmed Davutoglu yê gotibû “Ger ku defterên di dema 7'ê Hezîran û 1'ê Mijdara 2015'an de bên vekirin wê gelek mirovan nikarin ji nava vê mijarê derkevin." bê guhdarkirin. Wê demê me dît ku li Amed, Pirsûs, GAR'a Enqere û Dîlokê teqîn pêk hatin û gelek kesan ji yana xwe ji dest dan. Ev hemû di serdema Serokwezîr Ahmet Davutoglu de pêk hatin. Em dixwazin Davutoglu li hemberî dadgehê amade bibe û bê guhdarkirin."  

	  

	Lisa Çalan jî anî ziman ku 3 sal in tê vê dadgehê û wiha got: "Heta niha we dengê me nebihîst. Em li vir bi rojan axivîn. Ez 4 salin êşê dijîm. 4 salin piyên min birîndar in. Êşa du piyên xwe yên tune dijîm. Ez di vê dozê de ji Walî, Serokwezîr û Serokomarê wê demê bi gilî me." 

	 

	Heyeta dadgehê piştî darizandinê biryara dewama girtina bersûcan da û daxwaza parêzeran a guhdarkirina Ahmed Davutoglu jî red kir. Heyetê doz taloqî 15'ê Mijdara 2019'an kir.