'Li hember astengiyan têkoşîna min xurt e hêviyên min her zindî ne' 

2019-07-15 09:02:20


	 

	Fîdan Ebdullah

	 

	ŞEHBA - Sîzar Beko keça astengdar a ji Efrînê, li kêleka astengiya xwe hestên xwe bi gotina stran û helbestan  ji hezkirina jiyanê re vedibêje. Sîzarê diyar dike ku wê tu carî çong li hember dijwariyan daneniye û wiha dibêje: "Astengiya min nebû kelem li hember hezkirina min a ji jiyanê re,  bi rêya stran û helbestan hestên xwe  tînim ziman."

	 

	Jina Ciwan Sîzar Beko ya 16 salî li gundê Babinês a Şehbayê dijî. Sîdar ji ber dilê xwe nexweş e, ji bo wê jî tevgera wê di jiyanê de kêm e. Ji bo nexweşiya Sîdar tu bijîşkan jê re dermanên şefayê pêşkêş nekirin. Sîdar ji bo wekî keçeke normal jiyana xwe bidomîne bi gotina helbestan hestên xwe îfade dike û dibêje divê mirov xwediyê biryara jiyana xwe be û ji xwe re derdorê rengîn bike.  

	 

	'Hêviyên min ji bo jiyanê tim zindî ne' 

	 

	Sîzar di destpêka axaftina xwe de bal kişand ser astengiya nexweşiya xwe û wiha got: "Min nehişt nexweşiya min bi temamî bandorek neyînî li ser jiyana min bike. Temenê min 13 salî bû, min dest bi nivîsandina helbest û stranan kir. Ji bo hestên xwe bînim ziman û têkoşîna xwe mezin bikim. Min tu caran nexweşiya xwe li hember jiyan û hêviyên xwe wekî asteng nedît. Hêviyên  min tim zindî ne." 

	 

	'Bi rêya stranan, min berxwedana serdemê derxit pêş'

	 

	Di axaftina xwe de Sîzar bal kişand ser êrîşa dewleta Tirk ên li ser Efrînê û wiha domand: "Efrîn bajarekî biçûke, lê gelê wê 58 rojan berxwedana xwe li dijî êrîşên dewleta Tirk domandin û teslîmkarî qebûl nekirin, lê ji bo em di bin  koletiyê de nejîn em  neçarî koçberiyê bûn û  me berê xwe da Kantona Şehbayê. Li gor astengdariya ku dijîm min bi rêya stranên xwe li Şehbayê berxwedana serdemê derxist pêş."

	 

	'Ez ê bi stranên xwe berxwedana Efrînê her bibêjim' 

	 

	Sîdar wiha dawî li axaftina xwe anî: Berxwedana me li ser axa Şehbayê didome  hêviya vegera Efrinê her di mejiyê me de ye. Ez ê bi stranên xwe berxwedana Efrînê her bibêjim. Li hember astengiyan têkoşîna min xurt e hêviyên min her zindî ne."