'Hûn çima bêdeng in?'  

2019-03-23 10:05:22


	 

	MÊRSÎN - Dayika Ayde Baran ku bi kurê xwe Çetîn Baran re axivî ku kurê wê baran ev 51 roj in di Girtîgeha Tîpa F ya 2'emîn a Tekîrdagê di greva birçîbûnê de ye wiha bang kir: "Çima hûn hê jî bêdeng in?''

	 

	Ayde Baran, dayika Çetîn Baran ê ku ev 51 roj in li dijî tecrîda li ser Rêberê PKK'ê Abdullah Ocalan li Girtîgeha Tîpa F'yê ya 2'emîn a Tekîrdagê di greva birçîbûnê de ye, xwest ku tecrîda li ser Abdullah Ocalan rabe. Ayde Baran, got moralê kurê wê baş bûye lê ji ber sedema ku di raya giştî de baş nebûye rojev bi gazin in û diyar kir, divê êdî gavên kêrhatî werin avêtin.

	 

	Çetîn Baran (28) ku di 2009'an de hat girtin, piştî  ku 7 mehan li Girtîgeha Pozantiyê ma, ji ber ku temenê wî biçûk bû bi rengê ku bê girtî bimîne were darizandin hat berdan. Ayde Baran diyar kir ku çawa ku kurê wê ketiye18 saliya xwe dîsa hatiye girtin û wiha domand: ''Kurê min hê zarok bû, rojekê birayê biçûk ê Çetîn bi lez hat cem min û got, 'yadê, polîsan kurê te birin'. Kurê min bi  endamtiya rêxistinê hat girtin.''

	 

	Ayde Baran dibêje, hê dema ku Çetîn di zikê wê de bûye ew ji Şirnexê çûne Mêrsînê. Dayikê got ew bi eslê xwe ji Êlkê ne, ji ber neçariyê çûye bajarê xerîb lê dîsa jî dewletê ew rehet nehiştine, li her deverê dewletê xwestiye ku ew girêdayî wan bin û dema ku wan jî dev ji eslê xwe bernedan dewletê ew kirine hedefa xwe.

	 

	'Divê tecrîd demildest rabe'

	 

	Ayde Baran dibêje ji kurê xwe yê ku ev 9 sal in di girtîgehê de ye bêhtir fikara hemû girtiyan dike û wiha got: ''Îro hevrêyên zarokên me weke Leyla û Yagız bedena xwe dane ber birçîbûnê. Daxwaza hemûyan yek e. Divê ev tecrîd demildest rabe. Hê çi qas berdêl wê werin dayin. Ne tenê li girtîgehan, bi têkoşîneke giştî heta ku ev tecrîd neyê şikandin, heta ku ev faşîzm neyê şikandin rehetî ji kesî re nîn e. Kurê min herî dawî dema ku li min geriyayî got odeyên wan guherandine. Yên di grevê de û yên ne di grevê de ji hev vediqetînin da ku hevgirtina wan bişkînin. Her wiha gotin, ji ber bêdengiya li derve jî ew xemgîn in. Kurê min got, ''yadê, çima her kes bêdeng e?''. Ez jî dibêjim, ''çima hûn bêdeng in?''