Jina Kurd a Êzidî ya bi birîndarî hat rizgarkirin: Rojeke nû li me hilat 

2019-03-21 09:00:47


	 

	Sorgul Şêxo

	 

	DÊRA ZORÊ - Hêzên QSD'ê di encama hemleya Bagera Cizîrê de li Baxozê 5  jin û 2 zarokên Kurdên Êzidî rizgar kiribûn. Yek ji jina bi navê Xunav Xidir Idêb ku bi birîndarî ji çeteyên DAÎŞ'ê hat rizgarkirin wiha got: "Dema em hatin rizgarkirin rojeke nû li me hilat."

	 

	Hêzên QSD'ê bi hemleya Bagera Cizîrê quncik li DAÎŞ'ê teng kir û di encama vê hemleyê de gelek Kurdên Êzidî hatin rizgarkirin. Yek ji jina bi navê Xunav Xidir Idêb ku bi birîndarî ji çeteyên DAÎŞ'ê hat rizgarkirin wiha got:"Em gelek bextewar in ku em hatin rizgarkirin. Em ê hewl bidin ku hemû êşên xwe ji bîr bikin û li ser piyên xwe bisekinin."

	 

	'Rojeke nû li me hilat'

	 

	Xûnavê kêliyên bi êş ên ku ev 5 sal in dijiya wiha vedibêje:"Ev 5 sal in em di destê çeteyên DAÎŞ'ê de ne û her em hatine firotin. Bi darê zorê ola Îslamê li ser me ferz kirin. Lê me ola xwe ya Êzîdiyatî qet ji bîr nekir û nakin jî. Jinên Êzîdî kirin kole, ronahiya çavên me veguherandin tarî û jiyana me tarî kirin."

	 

	'Ez birîndar bûm YPJ'ê min derman kir'

	 

	Xûnavê wiha dewam kir:"Di saetên berbangê de şer dest pê kir ez û kurê xwe birîndar bûn. Dema ku min xwest kurê xwe bibim nexweşxaneyê çeteyan em qebûl nekirin û kurê min wiha jiyana xwe ji dest da û şervanên YPJ'ê ez rizgar kirim. Min derman kirin."

	 

	'Ez ji YPJ'ê bawer bûm dê me tenê nehêlin'

	 

	Xûnavê spasiya hêzên YPJ'ê kir û wiha dawî li axaftina xwe anî:"Ez gelekî kêfxweş im ku şervanên rojê YPJ'ê em rizgar kirin, ez bawer bûm ku YPJ'ê dê werin me rizgar bikin."

	 

	'Hêvî dikim wan bibînim'

	 

	Xûnavê hêviya xwe anî ziman û wiha dawî li axaftina xwe anî:"Ez bi hêvî me dema ku ez biçim Şengalê dayik, bav, xwişk û birayên xwe bibînim."