Sê jinên şoreşger hatin bibîranîn, Leyla Guven hat silavkirin 

2019-01-21 15:38:46


	 

	NAVENDA NÛÇEYAN - Li bajarê Frankfûrtê yê Elmanyayê sê jinên şoreşger hatin bibîranîn ên ku şeş sal berê hatibûn qetilkirin. Berxwedana Leyla Guven jî hate silavkirin.

	 

	Sakîne Cansiz, Fîdan Dogan û Leyla Şaylemez ên ku li Parîsê hatibûn qetilkirin, li Frankfûrtê hatin bibîranîn.

	 

	Metîn Cansiz ê ku birayê Sakîne Cansiz e, dê û bavên Leyla Şaylemez Şîfa û Cûma Şaylemez, Mûstafa Temîzkan ê ku kurê Leyla Guven e û Şengê Kahraman a ku diya Erdal Sîncer jî tevlî bibîranînê bûn.

	 

	Di bibîranînê de Armanc Goşkar (Sûna Kizilkaya) a ku Navenda Parastina Gel diyar kiribû şehîd bûye û rojnameger Hrant Dînk jî hatin bibîranîn.

	 

	Di bibîranînê de sînevîzyona li ser têkoşîna sê jinan û ya li ser têkoşîn û xebata Leyla Guven jî hate nîşandan.

	 

	Di şevê de Xelatên Ked, Rûmet û Serketinê hatin dayîn.

	 

	Leyla Guven a ku 75 roj in di greva birçîbûnê de hêjayî Xelata Rûmetê hate dîtin. Xelat radestî Mûstafa Temîzkan hate kirin ê ku kurê Leyla Guven e.

	 

	Di şeva bibîranînê de endama Tevgera Jinên Kurd a Ewropayê Nûpel Mûnzûr got ku, “Em nabêjin ku kî kujer e, em ê hesap ji kujeran bixwazin. Armanca hevpar a Sara, Rojbîn û Ronahî ev bû ku jin azad bibin. Ev berdêlên ji bo azadiyê em didin gelekî giran e. Lê di vê têkoşînê de bi hezaran Sara, Rojbîn û Ronahî êdî hene. Bi xurtkirina berxwedanê em hesap ji kujeran bixwazin.”

	 

	Di şevê de hunermenda ji Bangladeşê Farzana Talûkder, Koma Îtalyan Campagnîa Sakûntala, Zerrîn û Rodan Akgul û hunermenda ji Ewropayê Nadîa Vîsser jî derketin ser dikê.