
Li Bîstanê Bajêr ê Komunal çinîna pêşîn 

2026-08-19 09:58:57


	&nbsp;

	AMED - Şaredariya Peyasê ji bo parastina mîrateya çandiniyê, tovên herêmî û zêdekirina hilberîna çandiniyê xebatên xwe didomîne. Di çarçoveya projeya “Bîstanê Bajêr ê Komînal ê Jinan” de ku ji aliyê Gerînendetiya Polîtîkayên Jinan ve li seraya şitildanînê ya Gerînendetiya Park û Baxçeyan hatibû avakirin, berhemên pêşîn hatin çinîn.

	&nbsp;

	Bîstanê Bajêr ê Komînal ê Jinan ku bi pêşengiya Yekeya Xurtkirina Aboriya Jinan tê birêvebirin, bû wesîle ku jinên ji taxên cuda yên navçeyê bên cem hev. Ev projeya ku bi armanca xurtkirina têkiliya kolektîf a bi axê re hatiye destpêkirin, di heman demê de derfetê dide ku jin kedeke hevpar bidin.

	&nbsp;

	Berên pêşîn hatin çinîn

	&nbsp;

	Di bîstanê komunal de, ji bo parastina tovên herêmî yên ku genetîka wan nehatiye guhertin, sewzeyên wekî behcan, îsot, fêkî û bamye hatibûn çandin. Niha jî berên pêşîn ên ku şîn hatine tên çinîn. Li bostanê ku bi keda hevpar a jinan mezin dibe, jin hem tevkariyê li pêdiviyên malên xwe dikin hem jî jiyana xwe ya aborî xurt dikin.

	&nbsp;

	'Bêhn û ruh dide siberoja me'

	&nbsp;

	Piştî berhevkirina berheman, Gerînendetiya Polîtîkayên Jinan bal kişand ser rola tovên herêmî di çandiniya domdar de û ev tişt gotin:

	“Pêvajoya me ya hilberînê ku me bi bikaranîna tovên xwezayî daye destpêkirin, îro berhemên xwe dan. Bêhneke xwezayî ji bostanê me tê û em bi vê hilberînê re pir kêfxweş in. Bi vê xebatê em hem cihêrengiya biyolojîk a herêma xwe û mîrateya wê ya çandî diparêzin, hem jî alîkariya xurtkirina aboriya jinan dikin. Zêdekirina van qadan û hilberîna bi tovên herêmî, ruh dide siberoja me. Em ê xebatên xwe yên bi vî rengî bê navber bidomînin.”

	&nbsp;

	Ruhê hevgirtinê xurtir dibe

	&nbsp;

	Bîstanê Bajêr ê Komînal ku bi nêzîkatiyeke demokratîk, ekolojîk û azadiya jinan tê meşandin, ne tenê bi hilberîna sewzeyan sînordar e. Ew her wiha di nav jinan de têkiliyên civakî xurt dike û piştgiriyê dide aboriya malbatê.

	&nbsp;

	Armanca sereke ya vê projeyê ew e ku piştgiriyê bide pêvajoyên hilberîna xwezayî, rola jinan di nava aboriyê de xurt bike û tovên xwezayî bigihîne nifşên nû.

	&nbsp;

	&nbsp;