WAN - Bi munasebeta salvegera 9'emîn a qetilkirina Rojnameger Deniz Firat de li ser gora Denizê ya li Wanê bernameya bibîranînê hat lidarxistin. 

 

Rojnameger Denîz Firat (Leyla Yildiztan) di 8’ê tebaxa sala 2014’an de di dema êrişên DAIŞ’ê yên li ser Wargeha Penaberan a Mexmûrê de jiyana xwe ji dest da. Rojnameger Denîz Firat di 9'emîn salvegera qetilkirina xwe de li Taxa Xecxatûn a Ebex a Wanê li ser gora xwe hat bibîranîn. Merasîma bibîranînê ji hêla Platforma Rojnamegerên Jin a Mezopotamyayê (MKGP) û Komeleya Rojnamegeran a Dîcle Firatê (DFG) ve hat kirin. Malbat û hevalên rojnameger ên Denîz di bibîranînê de amade bûn. 

 

‘Ji bo çapemeniya azad bû sembol’

 

Piştî deqeyek rêzgirtinê, endama MKGP'ê û nûçegihana JINNEWS’ê Rojda Aydin axivî. Rojda, anî ziman ku Denîz Firat ji bo çapemeniya azad bûye sembol û mînakek. Rojda, diyar kir ku Denîz Firat ligel êrîşê DAÎŞ’ê jî dev ji qada xwe û nivîsandina nûçeyan bernedaye û gotina wê ya “Hûn herin ez ê bi qemeraya xwe şer bikim” bi bîr xist. Rojda, diyar kir ku Denîz Firat beriya 9 salan jiyana xwe ji dest daye lê ew wek çapemeniya azad her roj xwedî têkoşîn û berxwedana Denîz derdikevin û wiha axivî: “Em ê heta dawiyê xwedî vê mîrateyê derbikevin. Wek çapemeniya azad û jinên kurd em ê li ser şopa wê bin.”

 

‘Tarîtî derxist ronahiyê’

 

Hevserokê DFG’ê Serdar Altan jî da xuyakirin ku bi ser qetilkirina Denîz Firat de 9 sal derbas bûye û got ew têkoşerên wê demê bi bîr tînin.  Serdar, destnîşan kir ku ew wê demê wek ji tarîtiyê derketinê pênase dikin û wiha domand: “Denîz Firat jî ji wan kesan yek bû ku tarîtî ber bi ronahiyê ve bir. Her wiha rojên ku em li ser vê axê behsa doza xwe bikin wan afirand. Denîz Firat her çiqasî têkoşerek çapemeniyê bû, her wiha girêdayî doz û gelê xwe bû jî. Têkoşînek bi vî rengî dimeşand. Di wan rojên tarî de got ‘ez dev ji qemeraya xwe bernadim’ û dev ji qemereya xwe berneda. Di nav şerê cîhanê de dema mirov lê dinêre gelek rojnameger di dema şopandina nûçeyan de hatin qetilkirin. Lê şopandina nûçeyan a Denîz Firat tiştekî cuda bû. Ji bo tevahiya çapemeniya cîhanê û çapemeniya kurd mînak bû. Di nava qadê de kedek mezin da. Gelek cangorî di vê oxirê de ji bo tarîtiyê derbixin ronahiyê xwe feda kirin. Bi tevahî têkoşînek mezin nîşanê me dide”

 

‘Denîz tu carî serê xwe netewand’

 

Herî dawî birayê Denîz, Seyat Yildiztan axivî û got ji ber çapemeniya azad xwedî li Denîz derdikeve ji bo wan gelek girîng e û wiha pê de çû: “Têkoşîna wê her tim serê me bilind girt. Piştî ku Denîz şehîd ket pênûsa wê li erdê nema. Xwişk û hevalên wê ev rê meşandin. Em wek malbat xwedî li têkoşîna ku Denîz daye derdikevin. Denîz tu carî serî netewand û em ê jî tu carî serî netewînin.”

 

Piştî axaftinan qurnefîl danîn ser gora Denîz Firat.