Ji Cizîra Botanê banga meşvanan: Qasidê aştiyê li Îmraliyê ye 

2024-02-07 10:47:36


	 

	 

	ŞIRNEX - Meşvanên Azadiyê li Cizîrê bi coşeke mezin hatin pêşwazîkirin. Parlamentera DEM Partiyê Salîha Aydenîz li vir axivî û got: "Ev meşa mê dê bigihêje armanca xwe. Armanca vê meşê heqîqet, yekîtî û aştî ye."

	 

	“Meşa Mezin a Azadiyê” ku ji bo azadiya fîzîkî ya Rêberê PKK’ê Abdullah Ocalan û çareserkirina pirsgirêka kurd bi rêyên demokratîk di roja 7’emîn de berdewam dike. Siyasetmedar û nûnerên rêxistinên girseyî yên demokratîk ên di Baskê Wanê de cih digirin, ji navçeya Silopiya ya Şirnexê ber bi navçeya Cizîrê ve hatin oxirkirin. Welatiyan, meşvan bi dirûşmên “Bijî berxwedana zindanan” û "Bijî berxwedana Îmraliyê" oxir kirin. 

	 

	Bi çepikan piştgirî dan meşvanên azadiyê

	 

	Meşvanên Azadiyê li devera Pira Yafesê ketina Cizîrê ji hêla Dayikên Aştiyê ve hatin pêşwazîkirin. Di pêşwazîkirinê de dayikan sirûdên “Berxwedan Xweş Doz e” û “Herne Pêş” xwendin. Piştre jî Dayikên Aştiyê ketin bin milê meşvanan û bi dirûşmên “Bijî berxwedana zindanan”, “Qasidê aştiyê li Îmraliyê ye”, “Jin, jiyan, azadî” û “Tecrîd mirin e, berxwedan azadî ye” dest bi meşê kirin. Esnafên ku polîsan di dema meşê de hewl didin nehêlin ji dikanên xwe derkevin û xelkê navçeyê bi çepikan piştgirî dan Meşvanên Azadiyê. 

	 

	Meşvanên Azadiyê heta avahiya Rêxistina Partiya Wekhevî û Demokrasiyê ya Gelan (DEM Partî) a Cizîrê meşiyan û li vir ji hêla girseyê ve bi dirûşmên “Bijî berxwedana zindanan” û “Bijî Serok Apo” hatin pêşwazîkirin. Yek ji kesên di nava girseya li pêşiya avahiya partiyê de disekinî jî dayika Mehmet Tunç, Esmer Tunç bû. 

	 

	7 roj in ji bo azadiyê dimeşin

	  

	Parlamentera DEM Partiyê Salîha Aydenîz li vir axivî û wiha got: “Ev 7 roj in em ji bo azadiya birêz Abdullah Ocalan û çareserkirina pirsgirêka kurd bi rêyên demokratîk dimeşin. Em dizanin ku ev meş dê bi ser keve. Armanca vê meşê heqîqet, yekitî û aştî ye. Bajar bi bajar, navçe bi navçe em meşiyan. Nêzikatiya îktîdar û hêzên ewlekariyê ya îro li Cizîrê tê nîşandan, nîşaneya tirsa wan a ji demokrasiyê ye. Bila dewlet, îktîdara AKP’ê û hêzên ewlekariyê bizanin ku dê nekarin meşa bidin sekinandin. Bi dehan caran Cizîran Botan hate hilweşandin lê her carê rabûn ser pêyan û têkoşîna xwe domand. Em ji Cizîra Botan bang dikin; gelê me polîtîkayên we yên ku vîna wan nas nakin qebûl nekir û dê qebûl neke. Ji ber polîtîkayên we îro Tirkiye di nava krîz û kaosê de ye.” 

	 

	'Muxatab Birêz Ocalan e'

	 

	Salîha, got ku dê meşa wan a ji bo azadiya gelê kurd û demokrasiya Tirkiyeyê bidome û ev tişt anî ziman: “Di salên 2013-2015’an de em bi hev re bi aştiyane jiyan. Her kesî dît ku dema birêz Ocalan diaxive, aştî çêdibe. Dema diaxive êdî mirin çênabin. Ev yek nîşan dide bê ka pirsgirêkan çawa çareser dike. Bila dewlet hişê xwe bîne serê xwe. Gelê kurd tu carî paşvegav neavêtiye û dê neavêje jî. Em 75 kes bi ser navê milyonan kesan ev 7 roj in dimeşin. Em li vir bang dikin; ji bo azadiya Kurdistanê û demokrasiya Tirkiyeyê divê muxatabiya birêz Ocalan bê naskirin. Dê têkoşîna me jî mezintir bibe. Dengê yekitî û aştiyê bibihîsin, vê zilmê ji holê rakin.” 

	 

	'Divê têkoşînê mezin bikin'

	  

	Namzeta hevşaredariyê ya DEM Partiyê ya Şaredariya Cizîrê Guler Tunç jî gel silav kir û wiha got: “Bandora tecrîdê li ser tevahiya civakê heye. Lê li ser jinan cuda tê meşandin. Ji ber ku avakerê paradîgmaya azadîxwaziya jinê birêz Ocalan e. Naxwazin jin bi awayekî azad civakê birêve bibin. Lewma tecrîdê li birêz Ocalan ferz dikin. Heke em jin azadiyê bixwazin, wê demê divê em avakerê vê fikrê azad bikin û ji bo vê têkoşîna xwe mezin bikin.” 

	 

	Namzetê hevşaredariyê yê Cizîrê Abdurrahîm Durmuş jî bal kişand ser dorpêçkirina Cizîrê û ev tişt anî ziman: “Vaye em dibînin bê ka tecrîdeke çawa ye. Em dixwazin êdî ev ewrên reş ên li ser Cizîr û welêt bên rakirin. Meşvanên Azadiyê jî ji bo belavkirina van ewrên reş hatin.” 

	 

	Nameyan radestî meşvanan kirin

	 

	Piştî axaftinan, Meşvanên Azadiyê derbasî avahiya partiyê bûn. Dayikên Şemiyê li vê derê patîk û lepik û nameyên nivîsandin radestî meşvanan kirin ku bişînin Îmraliyê. Zarokeke keç a şel û şepik li xwe kirî jî nameya ku nivîsandî û pêlîstoka xwe radestî meşvanan kir û xwest ji Abdullah Ocalan re bên şandin. 

	 

	Bernameya biranînê hat lidarxistin

	 

	

	 

	Li avahiya partiyê ji bo kesên di dema qedexeya derketina kolanan a Cizîrê de jiyana xwe ji dest dayîn merasîma bîranînê hate lidarxistin. Di bernameyê de 177 kesên ku hatin qetilkirin hatin bibîranîn. Li cihê bernameyê pankarta navê kesên ku hatin qetilkirin bi sernavê "Lehengên Cizîra Botanê' hat daliqandin. 

	 

	'Me soz daye em ê têbikoşîn'

	 

	Bername bi rêzgirtinê destpê kir. Hevseroka Komeleya Çand, Yekitî, Piştevanî û Alîkariya Malbatên ku Xizmên xwe li Dergûşa Şaristaniyê Winda Kirine (MEBYA-DER) û di heman demê de 2 zarokên xwe di dema qedexeyên derketina dervê de winda kir Esmer Çıkmaz axivî û got: "Qetîlkirina kesan hêj di bîra me de nin. Ne 9 sal 900 sal derbas bibe jî em heman êşê dikişînin. Lê me soz daye wan em ê heta dawiyê têbikoşin. Em tecrîdê yek car şermezar dikin."

	 

	'Em bi hêz in û em ê bighijîn armanca xwe'

	 

	Di bernameya bîranînê de parlamentera DEM Partiyê ya Şirnexê Ayşegul Dogan axivî û wiha nêrînên xwe anî ziman: "Hatina me  û yekitiya li Cizîrê gelek girîng e. Li Cizîrê bi salan e têkoşîn didome. Ev têkoşîna bi hêz bûye sembol ji Kurdistanê re. Ji Cizîrê belavî Stenbolê dibe. 40 û 45 sal in berxwedan didome. Ew kesên ku naxwazin meşa me û dengê me bibhîsin divê bizanin ku em ê bi azadî û aştiyê bighîjin armanca xwe. Her wiha çend sal derbas dibe bila bibe em tu carî qetlîama li Cizîrê ji bîrnakin. Divê bê zanîn ku em ê teqes tecrîdê têk bibin û dê deriyên Îmraliyê vebibin. Em ê dengê Birêz Ocalan ragihînin tevahiya cîhanê. Piştî ku dayik biryar bidin kesek nikare bibe asteng. Em bi hêz in û em ê bighîjin armanca xwe." 

	 

	Piştî axaftinan sînevîzyonek derbarê qetlîama ku li Cizîrê pêk hatî de hat nîşandan. 

	 

	Bernameya bîranînê piştî berzkirina dirûşmeyan bi dawî bû.