DEM Partiyê namzetên xwe yên jin da naskirin 

2024-01-29 11:07:28


	 

	
		AMED - Berdevka Meclisa Jinan a DEM Partiyê Halîde Turkoglû di merasîma danasîna namzetên jin ên hevşaredariyê de diyar kir ku ew ê di 31’ê adarê de qeyûman bişînin û wiha got: “Hevserokatî xeta me ya binefşî ye.”
	
		 
	
		Partiya Wekhevî û Demokrasiyê ya Gelan (DEM Partî) ji bo danasîna namzetên xwe yên hevşaredarên jin ên ji bo hilbijartinên herêmî yên 31’ê Adarê, li hotêleke Amedê bi zaravayê kurmancî bi dirûşma “Dema jinan vîna jinan” û bi zaravayê kirmanckî bi dirûşma “Demê cinîyan îradeyê cînîyan” bername li dar xist. Li eywana bernameya danasînê pankartên “Li dijî tundiya dewleta mêr bi vîna jinê ber demokrasiya xwecihî ve” û “Jin, jiyan, azadî” ku bi 11 zimanan hatiye nivîsandin hatin daliqandin. Hevseroka Giştî ya DEM Partiyê Tulay Hatîmogûllari, Hevseroka Giştî ya Partiya Herêmên Demokratîk (DBP) Çîgdem Kiliçgun Uçar û gelek kes tev li bernameyê bûn.
	
		  
	
		Bername bi rêzgirtinê dest pê kir û piştre jî Berdevka Meclisa Jinan a DEM Partiyê Halîde Turkoglû axivî. 
	
		 
	
		'Ev modêl jî modêla jinê ye'
	
		 
	
		Halîde diyar kir ku wan şahidiya kêliyên dîrokî kirine û got ku bi vê hêvî û moralê diçin hilbijartinên 31'ê Adarê. Bi domdarî Halîde destnîşan kir ku bi pêşhilbijartinan pîrozbahiya demokrasiyê li dar xistine û hemû beşdar silav kir. Halîde, da zanîn ku wan bi feraseta demokrasiyê ji asta herêmî dest pê kirine û ev tişt anî ziman: “Bi vê kelecanê em ber bi hilbijartinê ve diçin. Me vîna xwe ya ji bo hilbijartina herêmî nîşan da. Em ê rê nedin polîtîkayên şerê taybet. Pergala hevserokatiyê ya ku me di warê siyasî de pêk anî, nûnertiya wekhev û hevserokatiyê jî di nav de ye, îro ketiye meriyetê. Ev modêl ne tenê ji bo jinan di meriyetê de ye. Ev pergal rê dide ku mêr jî bêyî kedxwariyê di jiyana wekhev de cih bigire. Zîhniyeta yekperest û feraseta netewedewletê ya ku heta îro bi hişmendiya serdest a mêr hatiye, hewl dide bi pêş bikeve. Îro ev feraset bi rêya qeyûman hewl dide xwe ava bike. Ev modêl jî modêla jinê ye.”
	
		 
	
		'Xeta me xeta binefşî ye'
	
		 
	
		Halîde bilêv kir ku hikûmetên heyî zayendperest in û ev nirxandin kir: “Qada me di rêveberiyên herêmî de ava kiriye vê hikûmetê dihejîne. Ev modêl di heman demê de qonaxa têkoşîna jinan a bi hezaran salan nîşanî me dide. Nêzî 200 sal in di navbera mafê dengdanê û mafê nûnertiyê de cudahî heye û li hemberî vê yekê têkoşîn jî heye. Pergala me ne tenê ji têkoşîna jinên kurd ên li Kurdistanê, ji têkoşîna jinên cîhanî jî feyz digire. Hevserokatî xeta me ya binefşî ye, sedema têkoşîna me ye. Çiqas êriş bikin jî m ê têbikoşin. Namzeta me ya Sêrtê Safiye Alagaş diviyabû îro li vir bûya lê hate binçavkirin. Ne rojnamegerî ne jî hevserokatî sûc e. Em ê ji bo vê têbikoşin.”
	
		 
	
		'Em ê ewilî qeyûman bişînin'
	
		 
	
		Halîde, daxuyand ku desthilat dixwaze bi tayînkirina qeyûman rejîmeke yekperest bide avakirin û destnîşan kir ku ew ê di 31’ê Adarê de qadên civakî û siyasal dîsa ava bikin û wiha dirêjî da axaftina xwe: “Ji ewil em ê qeyûman bişînin. Niha gelek hevalên me yên ku pergala hevserokatiyê xistine meriyetê di girtîgehan de ne. Desthilatê gelek saziyên me yên jinan girtin. lê em ê dîsa wan vekin. Li Amedê tundiya li dijî jinan zêde bûye û sedem jî qeyûm in. Navendên jin û ciwanan bûne cihê tiryakê. Her wiha tax jî kirine cihê tiryakê. Em ê hesaba vê yek bi yek bipirsin.” 
	
		 
	
		Rêya 3'yemîn...
	
		 
	
		Berdevka Meclisa Jinan a DEM Partiyê Halîde di berdewamiya axaftina xwe de bal kişand ser grevên birçîbûnê yên bi daxwaza azadiya fîzîkî ya Rêberê PKK’ê Abdullah Ocalan û çareserkirina pirsgirêka bi rêyên demokratîk hatine destpêkirin û axaftina xwe wiha qedand: “Ji bo rakirina tecrîda li ser birêz Ocalan û aştiyê, hevalên me di greva birçîbûnê de ne. Em ji bo jiyaneke nû ava bikin dimeşîn û em ê bedel jî bidin. Weke DEM Partiyê em ê polîtîkaya xwe ya rêya 3’yemîn bixin meriyetê.”
	
		 
	
		Piştî axaftina Halîde Turkoglû, sînevîzyon hat nîşandan. Şaredara Dêrikê ya Partiya Demokratîk a Gel (HADEP) Ayşe Karadag silav da beşdaran. Herî dawî jî strana jinan a DEM Partiyê hate parvekirin.
	
		 
	
		'Heta em derabeyên ji hesin bihelînin em ê têkoşîna xwe bidomînin'
	
		 
	
		Piştre Hevseroka Giştî ya DEM Partiyê Tulay Hatimoglullari derket ser dikê jin bi kurdî, erebî û tirkî silav kir. Tulayê got wê ji girtîgehê silavên Gultan Kişanak, Figen Yuksekdag, Zeynep Boga, Leyla Guven, Semra Guzel, Ayşe Gokkan aniye û wiha got:"Em sozê didin. Heta em derabeyên ji hesin bihelînin em ê têkoşîna xwe bidomînin. Heger îro em li vê eywanê bin bi saya têkoşîna li dijî zihniyeta mêr a 5 hezar salan e. "
	
		 
	
		'Bila soza me ya ji hemû rêhevalên me re be'
	
		 
	
		Tulayê da zanîn dengdana pêk hatiye ji cîhanê re bûye mînak û wiha got:"Me bi rêya vê dengdayinê demokrasî pêk anî. Em di bin şerekî de siyasetê dikin. Di serdemeke aqlê mêr ê faşîst, nîjadperest, netewperest cîhanê bi rê ve dibe de em siyasetê dikin. Em 5 hezar sal in wekî jin tên çewisandin. Îktidar destkeftiyên jinan dike hedef. Wekî Gultan Kişanak dibêje em ê îktidara wan a ceberut têk bibin û kariyera xwe bi dest bixin. Bila soza me ya ji hemû rêhevalên me re be."
	
		 
	
		'Em ê serfiraziya 31'ê Adarê diyarî dayikên xwe bikin'
	
		 
	
		Tulayê wiha dawî li axaftina xwe anî: "Em ji Şiliyê heta Arjantînê ji Meydana Tahrirê heta Rojava û ji Bexdayê heta Hewlêrê dibêjin em jin serî natewînin, têdikoşin û em hemû jinan silav dikin. Em silavên xwe ji Clara Zetkinlere Roza Luksembur, Behice Boran, Şirin Tekeliler, Sakine, Sêvê, Hevrîn Xelef re dişînin.Em ê serfiraziya 31'ê Adarê diyarî dayikên xwe bikin."
	
		 
	
		Piştî axaftina Tulayê namzetên hevserokatiyê derketin ser dikê û ew dan naskirin.