Daxuyaniya malbata girtiyê nexweş ê jiyana xwe ji dest da 

2023-10-21 14:52:43


	 

	 

	ÎZMÎR - ÎHD’a Îzmîrê diyar kir ku Yilmaz Ozalp ê li girtîgehê ji ber krîza dil ku derbas kiribû jiyana xwe ji dest da di encama binpêkirinan de miriye. 

	 

	Şaxa Komeleya Mafên Mirovan (ÎHD) a Îzmîrê têkildarî Yilmaz Ozalp ê li Girtîgeha Şakrana Îzmîrê ya Tîpa T’yê di 5’ê tebaxê de krîza dil derbas kir û li nexweşxaneyê jiyana xwe ji dest da li avahiya xwe civîna çapemeniyê li dar xist. Rêveberên ÎHD’ê û malbata Yilmaz Ozalp tev li civînê bûn. 

	  

	Hevseroka ÎHD’a Îzmîrê Zîlan Gumuş axivî û Yilmaz bi saxlemî ketiye girtîgehê û ew mirî ji girtîgehê hatiye derketin. Zîlan da zanîn ku Yilmaz di encama şert û mercên zextên derûnî û fizîkî de nexweş ketiye û got: “Li girtîgehan binpêkirinên mafan ên li ser hev pêk tên. Gelek dereng agahiyê didin malbata Yilmaz. Piştî wî dibin nexweşxaneyê malbat ji neçarî diçe destûrê ji dozgeriyê dixwaze ku pê re hevdîtin bike. Hem rêveberiya nexweşxaneyê û hem jî wezîfedarên din muameleyek xerab nîşanî malbatê didin. Yilmaz bi awayekî ku destên wî kelemçe kirî ne tê tedawîkirin. Ev binpêkirina mafê mirovî ye. Di dema pêvajoya nexweşxaneyê de jî û piştî Ozalp mir jî me gelek nivîsên pêwîst nivîsand. Lê belê tu bersiva me nehat dayîn. Em ê wek ÎHD’ê her bikevin pey vê bûyerê û bişopînin.”

	  

	Bavê Yilmaz Ozalp, Ekrem Ozalp jî diyar kir ku gelek binpêkirinên mafan li dijî lawê wî pêk hatine û got: “Piştî çend mehên girtîgehê lawê min krîz dil lê da. Rakirin nexweşxaneyê. Li wir anjiyo bû û tenê rojek li nexweşxaneyê hiştin û wî dîsa birin girtîgehê. Piştî heft mehan dîsa krîza dil lê da û vê carê jiyana xwe ji dest da. Agahî jî nedan me. Jixwe lawê min li girtîgehê jiyana xwe ji dest daye. Du mehan li nexweşxaneyê girêdayî makîneyê tê ragirtin.” 

	 

	Dayika wî Nazîme Ozalp, diyar kir ku kurê wê bi saxî çûye girtîgehê, lê cenazeyê wî dane wan û wiha bilêv kir: “Ez çûm serdana kurê xwe li nexweşxaneyê. Min dît ku destên wî kelepçekirî ne. Min ji wan pirsî 'Ma lawê min ê ji vir bifire, ji ber ku we dest û lingên wî girêdane?' Heta ku înfaza wî hat taloqkirin kelepçeyên wî nehatin rakirin. Paşê ez dîsa çûm û destên xwe danîn ser rûyê wî. Dema ez vegeriyam malê min ji zarokên xwe re got kurê min miriye. Doktoran jî baş li kurê min nenihêrîn. Wan kurê min kuştin."