Dêrsimiyan piştgiriya tam dan namzeta Partiya Çep a Kesk  

2023-04-17 09:10:32


	 

	Fatma Gokhan-Nişmiye Guler

	 

	DÊRSÎM - Li Dêrsîmê ku wê sê namzetên din di hilbijartinan de têbikoşin, namzeta Partiya Çep a Kesk Ayten Kordu ji jinan piştgiriya tam girt. Jinên Dêrsîmê diyar kirin ku wê li dora namzetên jin bibin xelek û teqez bi ser bikevin.

	 

	Ji hilbijartinên 2023’yan ên serokomarî û giştî re demek kurt ma. Namzet diyar bûn û li her bajarî xebat tên meşandin. Yek ji van bajaran jî Dêrsîm e.

	 

	Namzeta herî xurt a Partiya Çep a Kesk e

	 

	Namzeta Partiya Çep a Kesk a Dêrsîmê Ayten Kordu ye. Ya CHP’ê Husniye Karakoyun e, ya MHP’ê Nîlgun Dalkiliç û yê AKP’ê jî Hakan Ozer e. Bi awayekî teqez li namzeta Partiya Çep a Kesk Ayten Kordu dinêrin.

	 

	Ji bo hilbijartinên ku sê jin û mêrek têdikoşin, jinên Dêrsîmê axivîn.

	 

	‘Partiya Çep a Kesk partiya azadiyê ye’

	 

	Aygul Aras diyar kir ku divê êdî desthilatdariya AKP-MHP’ê biçe û gotin ew piştgiriyê didin Partiya Çep a Kesk. Aygulê wiha dirêjî dayê: “Partiya Çep a Kesk partiya azadiyê ye. Partiya edalet û demokrasiyê ye. Partiya her kesî ye. Edî bes e. Ciwanên me hat girtin hatin surgunkirin. Ez 65 salî me hesreta ziman, çand û axa xwe me. Êdî bes e, jin jiyan azadî.”

	 

	Jina bi navê Sevîm Saglmam jî daxuyakirin ku bendewariya min ji hilbijartinê ev e ku em wek nasname bên qebûlkirin û wiha dirêjî dayê: “Bila em azad bin. Hedefa me ev e ku em qezenc bikin. Bila zarokên me, em sewal û axa me azad bijîn. Em dixwazin qedexe tune bin.  Ji bo azadiyê em dibêjin Partiya Çep a Kesk.”

	 

	‘Em piştgiriyê didin’

	 

	Şengul Perk jî der barê namzeta jin a Dêrsîmê de wiha vegot: “Namzeta jin e û ev ji bo me gelek girîng e. Ev demek dirêj e ji Dêrsîmê namzeta jin nehatibû nîşandan. Em gelek kêfxweş bûn. Em piştgiriyê didinê.”

	 

	‘Em pê bawer dikin’

	 

	Derya Ozal jî kêfxweşiya xwe anî ziman û got yekane daxwaza wan azadiya Kurdan e û Kurd bila êdî azadiya xwe bi dest bixin.

	Jina bi navê Dîren jî diyar kir ku li Dêrsîmê qezenckirina jinekê gelekî girîng e û wiha pê de çû: “Ev wê ji bo gelê Dêrsîmê gelek baş be. Li vî welatî her roj jin tên qetilkirin. Em naxwazin bimrin. Namzeta Partiya Çep a Kesk wê bibe bersiva daxwazên jinan.”

	 

	Besîme Gok jî ev titş bi lêv kir: “Em ji ber ku namzeta me jin e gelek kêfxweş in. Em ê li dora wê bibin xelek û bi ser kevin. Guherîn wê bi jinan pêk bê. Jinên Dêrsîmê serkeftî ne. Em ê bi namzeta xwe re bi ser kevin.”

	 

	Jina bi navê Leyla Arslan jî diyar kir ku wê wek jin bi ser kevin û hebûna jinan nîşanê wan bidin.