Melayê mizgeftê cenazeyê Mehmet Sevînç neşûşt 

2022-04-08 14:09:31


	 

	 

	STENBOL - Melayê mizgefta ku cenazeyê Mehmet Sevînç ê di girtîgehê de jiyana xwe ji dest da anînê, bi hêceta ku “qedexe ye” nehat şûştin û wesayîta cenaze jî nehat dayîn. 

	 

	Girtî Mehmet Sevînç ê 63 salî yê 28 sal bûn girtî bû û di Girtîgeha Tîpa T ya Akhîsarê dihat ragirtin, di 3'yê Nîsanê de bi awayekî biguman xwîn çûbû ser mêjiyê wî di nexweşxaneya lê dihat dermankirin jiyana xwe ji dest dabû. Cenazeyê Mehmet Sevînç piştî karê otopsiyê yê li Saziya Tiba Edlî (ATK) a Îzmîrê radestî malbata wî hat kirin. Cenazeyê Mehmet Sevînç duh bi balafira kargoyê ji Balafirgeha Adnan Menderes anîn Balafirgeha Sabîha Gokçen. 

	 

	Malbata ku wesayîta cenaze nedanê, bi derfetên xwe duh bi şev cenaze anîn morga Mizgefta Pîrî Reîs ya li Taxa Pîrî Reîs a navçeya Darica ya Kocaeliyê. Cenazeyê Mehmet Sevînç ji bo ku li Goristana Nene Hatûn a Daricayê were definkirin, ketin rê. 

	 

	Polîsan di ketina navçeya Daricayê de konvoya cenazeyê Mehmet Sevînç sekinandin û gef li malbatê xwarin ku dirûşmeyan berz nekin. 

	  

	Cenazeyê Mehmet Sevînç ê anîn Mizgefta Pîrî Reîs, ji aliyê melayî ve bi hêceta ku “qedexe” ye nehat şûştin û wecibeyên olî nehatin pêkanîn. Melayekî ku malbatê bi derfetên xwe anî, cenazeyê Sevînç şuşt û wecîbeyên olî pêk anîn. 

	  

	Welatiyên ku ji bo tev li merasîma cenaze bibin bi wesayîtên xwe hatin, bi hêceta wesayîtên xwe li derdora mizgeftê park kirine cezayê pere li wan hat birîn. 

	 

	Nûçegihanên ajansa me û Ajansa Nûçeyan a Mezopotamyayê (MA) ku ji bo merasîma cenaze bişopînin çûn mizgeftê jî hewl dan bên astengkirin. Polîsên ku rojnamevan dorpêç kirin, nasnameyên wan kontrol kirin, li ser wan geriyan û tundiya devkî û fîzîkî li wan kirin. Polîsan gef li rojnamevanan xwarin ku nahêlin ew nûçeyê bişopînin û rojnamevan ji qadê dûr xistin. 

	 

	Piştî nimêja di bin dorpêça polîsan de hate kirin cenazeyê Mehmet Sevînç ber bi Goristana Nene Hatûn a Daricayê kete rê. Di vê navberê de malbatê lorand.