‘Şarê Rojawanî do ser bikewo’

2024-12-10 11:03:21


	 

	AMED - Verfeka Meclîsê Cinîyan ê DBPyî Bêrîvan Bahçecî bale ant dişminîyê hemverê kurdan ser o û îdareyê xoser ê Vakur û Rojhelatê Sûrîye û vat: "Dewletê ke bi zîhnîyetê DAIŞî têgêrenê do bi destê cinîyan vînî bikerê. Kurdî do ser bikewê û şarê Rojawanî ser bikewo.”

	 

	Vakur û Rojhelatê Sûrîye de hêrişê dewleta tirkan û hemkaranê aye bêmabên dewam kenê. Hemverê hêrişê ke nê rojê peyînan de zêde bîyî, îdarekarîya xoserî 1ê kanûne de seferberî neql kerd. No hewtetêk o ciwan û cinî mîyan de xeylêk kesî tewrê seferberî bîyî. Pêwa seferberî xeylêk cayê dinya zî reaksîyonê hemverê hêrişan dewam kenê.

	 

	Verfeka Meclîsê Cinîyan ê Partîya Herêmê Demokratîke (DBP) Bêrîvan Bahçecî ajansê ma JINNEWSî rê qalî kerd. 

	 

	Bêrîvan Bahçeçi, destpêk de wina vat: "Çeteyê ke herême de bîyaye yê, merdim nêeşkeno Tirkîya ra xoser bigîro. Wexto ke babete bena Rojava û kurdî dewleta tirkan tu wext xoser tênêgerana. Rojê vîyarte de Tirkîya atmosferêk prosesê çareserî awan kerd, labelê hetêk ra zî ma vînenê ke hêrişê Rojawanî kena. Netîce de 10 serrî yo vurnayîşêk pê nêame û hişmedîyê dewlete yê hemverê kurdan de tu wext nêvurya."

	 

	'Şarê Rojawanî do ser bikewê’

	 

	Bêrîvan Bahçecî, dewam de wina vat: "Ma sey Têgêrayîşê Cinîyanê Kurdan vanê, seserra 21ine do biba seserra cinî. Dewletê ke dişminîyê cinîyan kenê û zîhnîyetê ke sey DAIŞî têgêrenê bi hêrişê hemverê cinîyan xo awan kenê. Nê semedî ra zî Destpêk de hêrişê cinîyan kenê. Şingal de bi hezaran cinî bazarê koleyan de ameyî rotiş. Nika zî cinî hemverê nê hişmendî de têkoşîn kenê. Dewletê ke bi zîhnîyetê HTŞyî û DAIŞî têgêrenê do bi destê cinîyan vînî bikerê. Kurdî do ser bikewê û şarê Rojawanî do ser bikewo.”

	 

	'Rojawan herêmêk dewlemend o'

	 

	Verfeka Meclîsê Cinîyan Berîvan Bahçecî vat: “Rojawan de xoserîyêk est o. Tîya de kurdan îdarekarîyê xo awan kerdê. Bi destê çeteyan hewl danê ke agêrê 10 serrî vernîya nika. Vurnayîşêk pêro dinya de ameyê kerdiş de DAIŞ reyke bîne hişmendîyê xo gane keno. Xora ser nêkewenê. Ganî bêro zanayîş ke ewro DAIŞ hêrişê herême keno do siba hêrişê welatê înan zî bikero.”

	 

	'Ma do kîşte şarê Rojawan û Şingalî de bê’

	 

	Bêrîvan Bahçecî tewr peyîn wina vat: "Şaro ke erdê xo ser de xoserî ciwîyeno, ganî vengê xo hemverê îşxalî de berz bikero. Ganî pêro kurdî hemverê hêrişê Rojawan û Şingalî de vengê xo berz bikerê. Semedo ke semedê pêro merdimayî tehlukeyêk pîl est o. Têgêrayîşê Cinîyanê Kurdan ke ça beno wa bibo do têkoşînê xo pîl bikero û do verê şarê Rojawan û Şingalî de bibo.”