Şehrîban Aslan 

 

AMED - Ame zanayîş ke hûmara şahidê nimite yê operasyonê destbendkerdişî yê ewroyî de çarçewa dewaya Gulistan Doku de resaya 2.

 

Her roje averberdişê neweyî derheqê Gulistan Doku, wendekara zanîngehe ya ke 5ê Çeleyê 2020ine de Dêrsim de vîndî bîye de vejînê werte. Dimayê şeş serran, pêlê verêne yê operasyonan aşma nîsane de ame kerdene û ewro bi pêlê diyîne yê operasyonan 15 kesî ameyî destbendkerdene.

 

Pêlê verêne yê operasyonan ê dewaya Gulistan Doku de, zafê raştîyî bi rayîrê îfadeyanê şahido nimite yo ke bi nameyê kodê "Duman"î vejîyayî werte.

 

Ame zanayîş ke pêlê diyîne yê operasyonan de, raştî serê bingeyê îfadeyanê şahido nimite yo ke bi nameyê kodê "Şubat"î vejîyayî werte û operasyon ame kerdene.