TEKÎRDAG - Hemsereka Medîa-Derî Leyla Gur, bal ant serê awanbîyayîşê komele û wina vat: "Her detayê bi xebatê destan û fedakarîya pîlî ya cinî û dayîkan ameye awankerdene. No keyeyê ma yo hempar o. Welatijê ke wazenê ziwan û kulturê xo yê maye bipawê, dawetê komeleya ma kenê. Bêrê ma vîr ra nêkerê ke ziwanê ma nasnameyê ma yo."

 

Komeleya Cigêrayîş û Averberdişê Ziwan û Kulturê Mezopotamya (Medîa-Der) ke komeleya verêne ya ke harêma Trakya de ameya akerdene. Bi xebatanê xo yê sey ziwan, huner û kulturî nêzdîyê di serran o harême de xebitîyena. Komeleya ke taxa Kizilpinarî ya qezaya Çerkezkoyî ya Tekîrdagî de ya, bi keda cinîyan ameya awankerdene û armanc kena ke ziwanê kurdkî vera polîtîkayanê asîmîlasyonî bipawo. Sewbîna, komele zaf çalakîyan virazena, sey atolyeyê tutan, dersê muzîkê adetî, kursê sazî, kursê erbaneyî û şewê dengbêjîye.

 

Hemseroka Medîa-Derî Leyla Gur ajansê ma JINNEWS'î rê qal kerd û bal ante serê kar û barê komele.

 

'Ziwanê ma nasnameyê ma yo' 

 

Leyla Gur wina ard ziwan: "Ma armanc kenê ke her kurdêk şêno pêro hetê ciwîyayîşî de bi hawayêko azad bi ziwanê xo yo maye qal bikero. Ma zext û polîtîkayanê asîmîlasyonî yê serê ziwanê kurdkî ra xeberdar ê. Mîyanê komeleya xo de, ma semedê tutan atolyeyanê perwerdeyî virazenê; ma mamosteyanê pisporan dir kursanê saz û erbaneyî virazenê. Sewbîna şewanê dengbêjîye virazenê ke yew stûnanê tewr muhîman ê kulturê ma ra yo. Semedê nê çalakî eleqeyêko zaf xurt û zerrîweş est o ke cinî, ciwan û tutî tede benê pêser. Welatîyê ke wazenê ziwan û kulturê xo yo maye bipawê, dawetê komeleya ma kenê. Bêrê ma vîr ra nêkerê ke ziwanê ma nasnameyê ma yo."

 

 

Bi serkêşîya cinîyan ame akerdene

 

Leyla Gur bal ante xebatê komele û vat: "Her detayê ke şima komeleya ma de vînenê bi xebatê destan û fedakarîya pîle ya cinî û dayîkan ameya awankerdene. Tîya de şimê şênê her çîyê ke kulturê ma dir eleqedar o bivînê. Her kesê ke game bierzo tîya xo keye de hîs keno. Ê ziwan, nasname û kokanê xo reyna vînenê. Vernîya ke ez bêra komele, mi kurdkî zaf rind nêzanayîne, labelê bi xêrê xebatanê tîya, ez nika ziwanê xo zaf başêr qal kena. No mi rê rûmetêko pîl o. Tîya, ma bi temamî bi zelalî û bêsînor bi kurdkî qal kenê. No keyeyê ma yo hempar o. Berê ma semedê her keso ke wazeno xo û kulturê ma nas bikero akerde yo. Çi tirk bo çi kurd bo. Her kesê ke wazeno ziwan û kulturê xo yê maye bipawo, bi xêr ameyo."

 

 

'Bi girêdayîşêko zerrîwaz kulturê xo gane verdenê'

 

Leyla Gur wina peynî qalkerdişê xo ard: "Nê semedî ra no teyna komeleyêk nîyo; o keyeyêko hempar o ke her kesê ke keweno zere ziwan, nasname û cewherê xo vîneno û xo bi temamî sey parêk ci hîs keno. Tîya her roje, ma bi rûmetî û kêfweşî bi kurdkî qal kenê. Ma şênê ziwanê xo yo maye bi hawayêko raşt vajê û pare bikerê. Ma bi girêdayîşêko zerrîwaz kulturê xo gane verdenê.”