AMED - Şaredarîya Peyasî bi beyanatêko nuştekî hişyarî da welatijan û neql kerd ke tayê kesê nênaskerdeyî nameyê dezgehî xebitnenê, belgeyê sexteyî amade kenê û vera pereyan sozê kar û xizmetî danê şarî. Şaredarîye eşkere kerd ke vera nê kesan prosesê huqûqî ameyo destpêkerdiş.

 

Goreyê beyanatê ke hetê şaredarîye ra semedê raya pêroyî ame vilakerdiş, rojanê peyênan de agahî resayî destê îdarekarîyan ke tayê kesî bi nameyê şaredarîye welatijan xapênenê.

 

Vejîyayo werte ke kesê ke tu têkilî û eleqeyê înan şaredarîye dir çin o, bi amadekerdişê belgeyanê sexteyan û vera girewtişê pereyan, sozê sey peydakerdişê karî û çareserkerdişê karûbaranê fermîyan danê welatijan û wina dewam kerd:

 

“Şaredarîya me binê tu şert û mercî de vera pereyan kesî nêkena kar û sewbîna semedê feydeyanê kesan tu xizmetêko pêroyî pêşkêş nêkena.”

 

'Ma pabeyê prensîbanê şefafî û huqûqî yê'

 

Şaredarîye beyanatê xo de bal ant serê prensîbanê xebate û dîyar kerd ke heme xebatê îdarekarîyanê herêmîyan goreyê serdestîya huqûqî, şefafî, hesabdayîş û nêzdîbîyayîşêkê merdim-merkezî yenê raybaredene. Ame dîyarkerdene ke hewldanê bi nê metodî rasterast prestîj û namê dezgehî kenê armanc û zirar danê bawerîya şarî.

 

Beyanat de ame neqlkerdiş ke semedê kes yan kesanê ke nê kenê, prosesê huqûqî yo lazîmî ameyo destpêkerdiş û na babete nêzdî ra yena taqîbkerdiş. Sewbîna veng da welatijan ke vera nê kerdoxan hişyar bê û nêkewê kayan.