Evîn Çîftçî

 

RIHA - Nuray Ereza ke dayîka 6 domanan a, semedê krîzê ekonomî û feqîrîye her ware de xebitîyena û têkoşînê debare dana, wina va: “Semedê rewşa ekonomî ez mecbûr a ke her karî bikera. Seba ke hewcedarê tu kesî nêba, her çîyo ke mi dest ra yeno ez kena. Seba ke ma cuya weşe bidê domananê xo, ma xebitîyenê.”

 

Tirkîya û Kurdistan de semedê krîzê ekonomî û îstîhdamê kêmî, şert û mercê cuye seba cinîyan her ke şono giran benê. Zaf cinîyî semedê feqîrîye û problemê debare, hem karê keyeyî hem zî teber de wareyan de, rezan de û baxçeyan de xebitîyenê. Cinîyê ke perçeyêk pîl ê rojî bi xebate vîyarnenê, keye de zî pêro karî kenê, domanan ewnîyenê û hewl danê ke cuya weşe bidê domananê xo.

 

Nuray Ereza ke dayîka 6 domanan û dewa Ulubag a Rihayî de ciwîyena, têkoşînê xo yo ke dana, ajansê ma dir pare kerd.

 

‘6 domanê mi est ê û mecbûr a ke her karî bikera’

 

Nuray Ereza da zanayene ke bêmabêne xebitîyena û wina neql kerd: “Ma bêmabêne xebitîyenê. Ma seba debara xo, seba hewcedarîyanê domananê xo xebitîyenê. Ma zehmetîye ancenê. Cuye zehmet bîya. Mêrdeyê mi xebitîyeno, ez zî xebitîyena. Mi erd ramit. Sibayî wurzena, domanan şirawena mekteb, karê keyeyî kena û dimayê ci şona mîyanê erdê xo. Sibayî ra hetanî şan de xebitîyena. Ez şan de şona keye, bêyê ke boya xo bigîra, reyna xebitîyena.”

 

‘Her çî seba domananê ma yo’

 

Nuray Ereze peynîya qiseykerdişê xo de nê çîyî vatî: “Seba domananê xo ma têkoşîn danê. Seba cuya weşe û aram. Semedê rewşa ekonomî mecbûr a ke kar bikera. Seba ke ma hewcedarê tu kesî nêbê, ma hewl danê. Her çîyo ke ma dest ra yeno ma kenê. Barê cinîyan her wext giran o. Ez heywanan ewnîyena, karê keyeyî û karê erdî kena. Rojê taybetî tesîr ma ser o nêkenê. Ma her wext xebitîyenê. Wa Homa quwet bido ma.”